Raġel inżamm arrestat wara li wieġeb mhux ħati li wassal lil martu biex tiġi soġġetta għal biża’ minn vjolenza waqt argument dwar spiża ta’ €3. Dan meta allegatament kisser siġġu quddiemha waqt l-argument.
L-Lspettur Omar Zammit qal lill-Qorti li l-mara ressqet rapport nhar is-Sibt li għadda filgħaxija fejn allegat li hi u żewġha kienu tlewmu, huwa insulentaha, qabad siġġu u kissru mal-art quddiemha. Hija kisbet punteġġ għoli fil-valutazzjoni tar-riskju meta sar l-assesjar.
L-Ispettur Zammit tkellem mal-allegata vittma mill-ġdid l-għada meta tat aktar dettalji dwar ir-relazzjoni tagħha ma’ żewġha. Ir-raġel, ħaddiem tal-manutenzjoni, wieġeb mhux ħati li ġegħel lil martu tibża’ li se tintuża vjolenza kontriha, aggrediha u heddidha.
L-avukat Noel Bianco, li jirrappreżenta lill-akkużat, talab il-ħelsien mill-arrest għall-klijent tiegħu. Il-prosekuzzjoni oġġezzjonat peress li l-allegata vittma għadha ma xehditx u t-tnejn kienu jgħixu fid-dar matrimonjali flimkien maż-żewġt itfal minuri tagħhom.
L-avukat Francesca Zarb, li assistiet lill-allegata vittma, qalet li dan ma kienx l-ewwel każ u kien hemm każ ieħor fejn il-klijent tagħha ħafret lill-akkużat u rranġaw ir-relazzjoni tagħhom. Hija żiedet li r-raġel irrifjuta li jagħtiha ċ-ċavetta tad-dar matrimonjali.
Zammit infurma lill-Qorti li l-koppja kienu qed jiġġieldu fuq spiża ta’ €3 dwar min se jħallas għal kopja taċ-ċavetta tad-dar. Dr. Zarb żiedet li ċ-ċavetta titħalla f’kaxxa taż-żraben barra l-appartament, u sostniet li dan sar biex jikkontrolla l-movimenti tal-mara. Is-suġġeriment intlaqa’ b’oġġezzjonijiet qawwija mid-difiża.
L-Avukat Bianco qal li l-qorti tista’ toħroġ ordni ta’ protezzjoni u l-klijent tiegħu mhux se jkellem lil martu. Huwa żied ukoll li qrabatu kienu fl-awla u setgħu jipprovdu indirizz alternattiv. L-avukat argumenta li r-raġel ħadem tliet impjiegi biex iħallas is-self li għandhom, u żied jgħid li l-mara ma kinitx taħdem.
Huwa enfasizza wkoll li l-klijent tiegħu kkopera bis-sħiħ mal-pulizija. L-avukat semma li l-koppja għandha tifel li għandu problemi ta’ saħħa, u r-raġel jieħu ħsieb it-tifel u jħallas għat-terapija tiegħu. “Dan ir-raġel kisser siġġu mal-art. Mhux qed niġġustifika l-imġiba tiegħu imma hemm ħafna rabja bejniethom,” sostna Bianco, u żied jgħid li l-aħjar għażla fis-sitwazzjoni attwali kienet li jimxu għas-separazzjoni.
Dr. Zarb qalet li iben il-koppja qed juża kliem kontra ommu, li “b’mod ċar mhumiex tiegħu”, tant li l-Pulizija tkellmu mat-tifel. L-Ispettur Zammit ikkonferma li t-tifel kien qed jinsulenta lill-ommu bi kliem “li b’mod ċar ma kienx ġej minn tifel ta’ 13-il sena.”
“Missieru jieħu lit-tifel għat-terapija. Huwa jħallas għaliha. Jekk ir-raġel jiġi miċħud il-ħelsien mill-arrest ma jkun hemm l-ebda dħul fid-dar,” qal l-Avukat Bianco. Wara li semgħet is-sottomissjonijiet, il-Qorti ċaħdet il-ħelsien mill-arrest tar-raġel peress li l-mara għadha ma xehditx.
L-ispettur Omar Zammit mexxa l-prosekuzzjoni.
