L-iżbruffar, sigħat ilu, tad-dħaħen mill-Muntanja Etna fi Sqallija qajjem paniku fost in-nies u t-turisti fil-viċinanzi li spiċċaw jiġru għal ħajjithom. Dan waqt li dħaħen kbar griżi kienu qed ibewġu mill-bokka tal-aktar vulkan attiv fl-Ewropa.
L-iżbroff kien l-aktar wieħed drammatiku għal snin u kellu jseħħ wara jiem konsekuttivi ta’ tregħid tal-art fl-inħawi.
Fl-aħħar sigħat ukoll, l-entità bl-isem Volcanic Ash Advisory Center Toulouse (VAAC) ħarġet l-ogħla livell ta’ twissija – ‘code red’ – għall-avvjazzjoni, iżda t-titjiriet komplew għaddejjin xorta mir-rotta viċin tal-Etna.
Il-vulkanoloġisti qalu li d-dħaħen mill-Etna kienu magħmulin l-aktar mill-ilma u l-gass sulphur dioxide – bid-dħaħen, imbagħad, javvanzaw b’rata rapida lejn il-lbiċ ta’ Sqallija.
Intant, il-kaġun għall-iżbroff setgħu kienu ċirkustanzi li, minħabba fihom, ikkrollat parti mill-vulkan madwar il-bokka tal-Etna – u bl-attività allarmanti tal-vulkan qed tonqos aktar ma jgħaddi ż-żmien.
Madankollu, is-sema fuq Katanja qed tixbaħ mantell griż minħabba s-sħab tal-ġmied li akkumulaw fuq din il-belt.
U fl-aħħar sigħat, il-vulkanoloġisti mal-Istituto Nazionale di Geofisica e Vulcanologia rreferew għall-‘funtani tal-lava’ fost stqarrija li t-theżżiż vulkaniku tal-Etna kien laħaq l-ogħla livell għal ħafna snin.
