Il-Qorti tal-Maġistrati, preseduta mill-Maġistrat Nadine Sant Lia, ikkonfermat li l-avveniment li sar f’Luqa Bocci Club f’Settembru 2023 ma jikkostitwixxix reat ta’ natura kriminali, hekk kif il-Qorti ma sabitx lil Bernice Fenech u Andre Attard ħatja ta’ ksur tal-morali pubbliċi, kif kienu akkużati inizjalment.
Il-każ kien ġibed attenzjoni kbira wara li xxandru filmati fuq il-midja soċjali li juru persuna jneħħi ħwejġu waqt party privat, b’interazzjoni suġġestiva mal-udjenza. Il-Pulizija ressqet l-akkużati quddiem il-Qorti taħt diversi akkużi, fosthom li promovew atti kontra l-morali pubbliċi skont l-Artikolu 209 tal-Kodiċi Kriminali – akkuża serja li ġġorr magħha konsegwenzi ta’ natura kriminali.
Iżda l-Qorti kienet ċara: l-ebda wieħed mill-akkużati ma wettaq reat kriminali ta’ ksur tal-morali pubbliċi. Filwaqt li l-imġiba setgħet titqies bħala mhux xierqa f’ċerti ċirkostanzi, ma laħqitx il-limitu li jeħtieġ il-liġi kriminali għal kundanna taħt dan l-artikolu.
Il-Maġistrat Sant Lia qalet: “Il-Qorti ma tistax tqis dan il-każ bħala wieħed li jaqa’ taħt il-kategorija ta’ atti kontra l-morali pubbliċi, kif definiti mil-liġi kriminali. Ma kienx hemm prostituzzjoni, sfruttament sesswali, jew imġiba li tagħmel ħsara lill-ġid komuni fis-sens kriminali.”
Minkejja dan, iż-żewġ imputati nstabu ħatja ta’ ksur ta’ regolamenti amministrattivi:
- Bernice Fenech ammettiet li organizzat l-avveniment mingħajr il-permessi mitluba, u li naqset milli tiżgura kontroll fuq dak li seħħ. Hija ġiet immultata €500.
- Andre Attard, bħala responsabbli tal-post, ġie mmultat €1,000 u ngħata probation ta’ sena wara li nstab ħati li ppermetta li jsir l-avveniment mingħajr awtorizzazzjoni.
Il-Qorti fakkret li għall-avvenimenti b’kontenut adult hemm bżonn ta’ permess speċjali taħt il-Kapitolu 10 tal-Liġijiet ta’ Malta – permess li hawnhekk ma ġiex applikat għalih.
Dan is-sentenza tidher li tistabbilixxi punt importanti: imġiba provokattiva jew xeni ta’ adult ma tfissirx awtomatikament ksur tal-liġi kriminali, sakemm ma jkunx hemm sfruttament jew dannu soċjali evidenti.
Dan il-każ se jkun punt ta’ referenza għal diskussjoni usa’ dwar l-organizzazzjoni ta’ wirjiet adulti f’lokalitajiet pubbliċi jew klabbs privati, u x’tip ta’ awtorizzazzjonijiet għandhom jingħataw u jiġu infurzati mingħajr ma jinkisru d-drittijiet fundamentali.
Għall-akkużati dehru l-Avukati Joe Giglio u Mattea Giglio.
