Mara ta’ 38 sena, li isimha ma jistax jixxandar b’ordni tal-Qorti, tressqet il-Qorti akkużata b’sensiela ta’ serq minn appartamenti tal-kiri fil-Gżira u Tas-Sliema, kif ukoll li kkawżat ħsara fi tnejn minnhom.
Il-Prosekuzzjoni allegat li l-mara daħlet fl-appartamenti billi ppruvat diversi kodiċijiet ta’ aċċess sakemm sabet wieħed li ħadem. Ladarba daħlet ġewwa, hi allegatament serqet diversi oġġetti.
F’każ partikolari, il-mara kienet saħansitra bbukkjat biex tmur f’appartament flimkien ma’ ħabiba tagħha qabel ma allegatament serqet oġġetti mill-post, fosthom magna tal-kafè. Il-valur totali tal-flus u l-oġġetti allegatament misruqa jlaħħaq madwar €6,000.
Id-difiża, immexxija mill-Avukat Nicholas Mifsud, talbet għall-ħelsien mill-arrest u enfasizzat li l-akkużata għandha problema serja tad-droga u teħtieġ għajnuna. Il-Qorti, preseduta mill-Maġistrat Ann Marie Thake, laqgħet it-talba fuq depożitu ta’ €500, garanzija personali ta’ €4,500, ordni temporanja ta’ superviżjoni u ordni ta’ trattament obbligatorju
Il-każ tressaq mill-Uffiċċju tal-Avukat Ġenerali, rappreżentat mill-Avukat Brendan Hewer, assistit mill-Ispetturi Ian Azzopardi u Elton Buckingham. L-akkużata kienet assistita mill-Avukat Nicholas Mifsud.
