Matul is-sena li għaddiet, Hospice Malta appoġġjat aktar minn 1,560 pazjent u l-maħbubin tagħhom, inkluż numru rekord ta’ 917-il riferiment ġdid. Dawn iċ-ċifri jirriflettu l-ħtieġa dejjem tikber għall-kura palljattiva professjonali li tipprovdi l-organizzazzjoni.
Hospice Malta, matul is-36 Laqgħa Ġenerali, ħabbret, li mmarkat sena sinifikanti fl-istorja tal-organizzazzjoni bil-perjodu ta’ tkabbir, impenn u kisbiet wara l-migrazzjoni b’suċċess tas-servizzi lejn il-faċilità l-ġdida ta’ St Michael Hospice.
Il-binja l-ġdida ppermettiet lil Hospice Malta tagħti kura aktar integrata u dinjituża lill-pazjenti u lill-familji tagħhom, mingħajr ebda interruzzjoni fis-servizzi.
Is-servizzi ewlenin komplew jespandu, inkluż id-Day Therapy Unit u l-programmi tal-kura fil-komunità, b’aktar minn 28,000 siegħa ta’ assistenza pprovduta, aktar minn 2,600 għodda ta’ tagħmir speċjalizzat misluf, u ħin ta’ rispons b’saħħtu li żgura li l-biċċa l-kbira tar-referenzi ġew ikkuntattjati f’temp ta’ ftit sigħat biss. Ir-rispons mill-pazjenti u l-familji baqa’ pożittiv ħafna, b’rata ta’ sodisfazzjon ta’ 98 fil-mija rreġistrata permezz ta’ stħarriġ kontinwu.
Iċ-ċaqliq lejn St Michael Hospice ġie deskritt kemm bħala sfida loġistika kif ukoll bħala suċċess kbir, li ppermetta kura ta’ kwalità ogħla f’ambjent kalm u xieraq. Hospice Malta kompliet ukoll tivvaluta l-effettività tal-interventi tagħha, b’data ċara li turi titjib sinifikanti fis-sintomi fiżiċi u l-benesseri emozzjonali fost il-pazjenti.
Saru investimenti fl-iżvilupp tal-istaff, fit-tkabbir tat-timijiet kliniċi u tal-operat, u fl-organizzazzjoni ta’ avvenimenti edukattivi, inkluża l-konferenza annwali dwar il-kura palljattiva u l-kors tal-ECEPC, li ġibdu parteċipazzjoni rekord minn professjonisti tal-kura tas-saħħa.
Il-voluntiera baqgħu ċentrali għall-missjoni ta’ Hospice Malta, b’aktar minn 180 individwu attiv li kkontribwew aktar minn 12,000 siegħa ta’ servizz matul is-sena.
It-timijiet tal-ġbir ta’ fondi u tal-komunikazzjoni mexxew diversi inizjattivi ta’ suċċess, fosthom is-Sunflower Campaign, il-lotterija annwali, u x-xandira diretta tat-telethon minn St Michael Hospice.
Dawn l-isforzi għenu biex jinġabru fondi vitali filwaqt li qajmu wkoll kuxjenza dwar xi tfisser verament il-kura palljattiva. Sħubijiet governattivi u donazzjonijiet privati saħħew aktar il-kapaċità tal-organizzazzjoni li taqdi lill-komunità.
Bernadette Bonnici Kind, iċ-Chairperson ta’ Hospice Malta, irringrazzjat lill-Arċidjoċesi ta’ Malta għas-sit verament imprezzabbli li ġie fdat lil Hospice bl-għan li nkomplu nħarsu l-ħajja ta’ kull persuna b’imħabba, b’kumpassjoni u b’dinjità sal-aħħar nifs u sa t-tmiem naturali tagħha.
Hospice, bl-għajnuna tal-Gvern, dejjem lesti nilqgħu lil kull min jasal ikollu bżonn kura paljattiva, biex ma jkunx hemm bżonn nirrikorru għal ebda triq oħra,” ikkonkludiet.
Ir-rapport finanzjarju awditjat, ippreżentat mit-Teżorier Vladimiro Comodini, ikkonferma li ġie ġġenerat surplus għas-sena li ntemmet f’Diċembru 2024. Dan ir-riżultat, approvat minn PwC permezz ta’ rapport tal-awditjar, jenfasizza l-immaniġjar u t-trasparenza tal-operat ta’ Hospice Malta. Is-surplus se jiġi investit mill-ġdid direttament biex jappoġġja u jiżviluppa aktar is-servizzi tal-kura palljattiva tal-organizzazzjoni.
B’ħarsa ’l quddiem, Hospice Malta se tibqa’ ffukata fuq l-espansjoni tal-kura bbażata fil-komunità u t-tnedija tal-Inpatient Unit fix-xhur li ġejjin, biex b’hekk ittejjeb aktar l-appoġġ olistiku pprovdut lill-pazjenti u lill-familji tagħhom.
