Raġel Serb li allegatament juża identitajiet multipli tressaq il-Qorti b’rabta ma’ sensiela ta’ serqijiet li jammontaw għal aktar minn €2,300 fi flus kontanti u affarijiet oħra minn tliet postijiet differenti. Dragan Cruguz, magħruf ukoll bħala Stojan Zubik, ġie akkużat b’tliet każijiet separati ta’ serq.
L-ewwel każ seħħ fit-2 ta’ Mejju, meta allegatament seraq flus kontanti, headphones, passaport u sett ta’ ċwievet minn proprjetà mmexxija mill-Court Services of Malta.
Fit-25 ta’ Mejju, f’dak li jidher bħala serq ippjanat minn qabel, huwa allegatament uża ċwievet oriġinali li kiseb b’mod frodulenti biex daħal fl-uffiċċji tal-aġenzija Remax Ltd f’San Ġiljan u seraq flus minn żewġ meżżi tas-sigurtà (safes).
It-tielet każ seħħ il-Ħamis li għadda f’ristorant Dizzy’s f’Ħamrun, fejn allegatament wettaq serq ieħor ippjanat u seraq ammont ta’ flus mill-kaxxa reġistratur. B’mod kumplessiv, huwa akkużat li seraq aktar minn €2,300.
Cruguz wieġeb mhux ħati għall-akkużi miġjuba kontrih. L-arrest tiegħu sar nhar il-Ġimgħa wara nofsinhar wara li pulizija li ma kienx xogħol rah f’ Tal-Pietà. Aktar tard ġie arrestat uffiċjalment fil-Marsa.
Fid-dibattitu fil-Qorti, ir-rappreżentant tal-Avukat Ġenerali, Clive Aquilina, spjega li l-prosekuzzjoni qed tiffaċċja diffikultajiet minħabba l-użu ta’ identitajiet differenti mill-akkużat.
Fil-fatt, Cruguz ipprovda informazzjoni personali konfliġġenti bosta drabi — fosthom dati ta’ twelid, indirizzi u anke ismijiet ta’ membri tal-familja differenti.
Waqt is-seduta, l-akkużat insista li jismu Stojan Zubik, li għandu 44 sena u jgħix il-Belt Valletta. Madankollu, il-lista tal-akkużi telenka ismu bħala Dragan Cruguz, ta’ 40 sena u residenti Marsaskala.
Il-Qorti ordnat li l-akkużat jinżamm arrestat peress fejn ma ntalabx ħelsien mill-arrest.
Il-każ qed jinstema’ quddiem il-Maġistrat Caroline Farrugia Frendo.
L-investigazzjonijiet u l-prosekuzzjoni qed jitmexxu mill-Ispetturi Daryl Farr, Gabriel Micallef u Elisia Scicluna, assistiti minn Clive Aquilina f’isem l-Avukat Ġenerali.
