Ħamrun Spartans qed ikomplu bil-ħidma tagħhom għal bidu ta’ staġun ġdid, iżda wisq aktar għall-ewwel impenn li se jkohhom dalwaqt, dak Ewropew fil-UEFChampions League, meta fl-aħħar sigħat iffinaliżżaw it-trasferiment tal-Arġentin, naturaliżżat Malti, Matías Nicolás García mingħand Floriana.
Għalkemm fuq il-midja soċjali, Ħamrun Spartans għadhom ma ħabbru ebda mill-akkwisti l-ġodda tagħhom, isem García jsegwi dak tal-internazzjonali mill-Litwanja, Domantas Simkus.
Isem Simkus tħabbar mill-President ta’ Ħamrun Spartans, Joseph Portelli fil-jiem li għaddew meta l-klabb organizza l-Laqgħa Ġenerali Annwali tiegħu.
García, li x-xahar li ġej jagħlaq 29 sena, kien inġieb f’Malta fis-sajf tal-2017 minn Senglea Athletic meta dawn tal-aħħar kienu qed jilgħabu fl-oħgla diviżjoni tal-futbol Malti.
Żewġ staġuni wara, García ssieħeb ma’ Floriana fejn f’sitt staġuni jilgħab magħhom, rebaħ l-akbar żewġ unuri tal-futbil Malti; il-Kampjonat Premier u l-FA Trophy.
García, kien wieħed mill-plejers iddentifikat mill-eks kowċ ta’ Malta, Devis Mangia sabiex jingħata ċ-ċittadinanza Maltija. Sal-lum García darbtejn ma’ Malta, u fid-darbtejn f’żewġ partiti ta’ ħbiberija kontra l-Venezwela u ċ-Ċekja.
García b’hekk se jingħaqad mal-bqija tal-iskwadra Ħamruniża, taħt it-tmexxija tal-kowċ il-ġdid, Giacomo Modica għal ġimgħatejn ta’ taħriġ intensiv li t-tim kollu se jkun qed jagħmel fl-Italja. Replay hu infurmat li dan it-taħriġ se jkun qed jinżamm fin-naħa t’isfel tal-Italja.
Intant mit-tim li rebaħ it-tielet Kampjonat konsekuttiv, fil-laqgħa ġenerali annwali sar magħruf li tliet barranin oħra ta’ Ħamrun Spartans m’għadhomx aktar parti mill-iskwadra. Dawn huma Roko Prsa, Elionay Freitas, u Raphael Lopes Silva.
Minn dak li nafu b’ċertezza s’issa, hemm ukoll żewġ plejers oħra Maltin li m’għadhomx ma’ Ħamrun Spartans. Dawn huma captain Steve Borg u d-difensur Matthias Ellul.
Fil-każ ta’ Borg, il-futur tiegħu għad irid jiġi deċiż filwaqt li l-left back ta’ 20 sena, Ellul mistenni jkun żvelat bħala wieħed mit-tmien akkwisti l-ġodda ta’ Valletta fil-jiem li ġejjin.
