Raġel ta’ 43 sena li qal li jaħdem għal rasu, inżamm arrestat wara li ġie mixli li allegatament kien involut f’argument vjolenti ma’ ġar tiegħu ta’ 79 sena, f’inċident li ħalla lill-anzjan bi ġrieħi gravi. Jonathan Vella, residenti Tas-Sliema, tressaq il-Qorti taħt arrest b’sensiela ta’ akkużi relatati ma’ argument li seħħ filgħodu tat-13 ta’ Ġunju f’dar fil-Mosta.
Il-każ ġie rrappurtat lill-Pulizija filgħaxija tal-istess jum. Il-Pulizija ġew infurmati għall-ewwel darba dwar l-inċident għall-ħabta tas-2pm, iżda meta marru fid-dar tas-suspettat ma sabuhx. Vella mar minn jeddu fil-Għassa tal-Pulizija għall-ħabta tat-8:30pm u ġie arrestat.
Fil-Qorti, Vella wieġeb mhux ħati għall-akkużi, fosthom li kkawża ġrieħi gravi lill-anzjan. Skont iċ-ċertifikat mediku, il-vittma kellu ġrieħi gravi. Il-prosekuzzjoni saħqet fuq il-vulnerabbiltà tal-vittma, billi dan kien anzjan u dipendenti.
Vella ġie akkużat ukoll li ġiegħel lill-vittma jsofri fiżikament u mentalment bi trawma bla ġustifikazzjoni, kif ukoll li heddu, insulentah u kiser il-paċi pubblika waqt l-inċident. L-avukat tad-difiża Arthur Azzopardi talab għall-ħelsien mill-arrest, billi sostna li l-akkużat mar volontarjament għand il-Pulizija.
Madankollu, il-Qorti ċaħdet it-talba minħabba s-serjetà tal-akkużi u l-fatt li l-vittma kienet persuna vulnerabbli. Intalbet ukoll ordni ta’ protezzjoni favur il-vittma biex jiġi mħares matul il-proċeduri.
Il-prosekuzzjoni qed titmexxa mill-avukat mill-uffiċċju tal-Avukat Ġenerali Kristina Bartolo u l-Ispettur Ryan Vella, filwaqt li l-akkużat qed jiġi difiż mill-avukat Arthur Azzopardi.
