Il-Qorti ċaħdet it-talba ta’ mara biex tirtira l-akkużi kontra żewġha ta’ 69 sena wara li dan ġie mixli li stupraha. Ir-raġel, li ma jistax jissemma b’ordni tal-Qorti, ġie akkużat ukoll li żamm lill-mara kontra x-xewqa tagħha, iffastidjaha, ikkawżalha biża’ ta’ vjolenza, kif ukoll li attakkaha u insulentaha.
Huwa wieġeb mhux ħati għall-akkużi. L-Ispettur Christian Cauchi informa lill-Qorti li r-raġel u l-mara kienu ilhom miżżewġin 39 sena u kellhom sitt itfal. Il-mara kienet marret fil-“Domestic Violence Hub” f’Santa Luċia, fit-28 ta’ Mejju biex tagħmel rapport kontra żewġha.
Hija allegat li dan kien beda jissuspetta li kellha raġel ieħor u beda jgħir għaliha. Saħansitra heddidha li “joqtolha u jidfina”. Hija spjegat lill-Pulizija li hi u żewġha ma kinux jorqdu flimkien imma f’sulari differenti. Madankollu, huwa kien jgħidilha li hu r-raġel tad-dar u jagħmel li jrid. Kien imur f’kamritha u jiġġegħelha taqdih sesswalment.
Il-mara qalet ukoll li kien isakkar il-bieb biex il-ġirien ma jisimgħu xejn. F’okkażjoni minnhom, huwa poġġielha sikkina ma’ għonqha u heddidha. Il-mara rrakkuntat li meta qalet xi ftit minn dak li kien qed jiġri lit-tfal u dawn ikkonfrontawh, huwa qalilhom: “Inħossni ħati li ma tgħajtix daqqa ta’ sikkina.”
Meta l-Pulizija marru jarrestawh, huwa heddedd li kien se joqtol ruħu b’idejh. Il-Qorti laqgħet talba tad-difiża biex ma jiġu ppubblikati l-ebda ismijiet. L-avukat Charlton Falzon Cascun, li rrappreżenta lill-mara, informa lill-Qorti li l-mara kienet preżenti fil-Qorti u kienet trid tirtira l-akkużi.
Il-mara titlob li jitwaqqfu l-proċeduri kontra żewġha
Il-prosekutur Jurgen Dalli talab li l-mara tixhed qabel jiddikjara l-pożizzjoni tiegħu. L-avukat tad-difiża Kathleen Calleja Grima qalet li kienet infurmata informalment li l-mara kienet trid tirtira l-każ, u li l-akkużat kien qed jiġi kkurat fl-Isptar Mount Carmel.
Meta telgħet fuq il-pedana tax-xhieda, il-mara qalet: “Żewġi mhux persuna aggressiva. Kollox li għandu bżonn huwa mħabba u kura. Ibni spiċċa l-ħabs ix-xahar li għadda minħabba droga. Żewġi għandu paranojja u demenzja. Insistejt biex ifittex kura.
“Huwa għamel dan, jien ma għamiltux. Eventwalment jien ukoll fittixt kura u ġejt iddijanjostikata b’depressjoni. Dak li għamel kien imbuttat mill-kundizzjoni tiegħu,” qalet il-mara, u żiedet li żewġha kien beda jissuspetta li kien hemm raġel ieħor fid-dar u bdew joħorġu paranojiet oħra.
Il-vittma spjegat ukoll li żewġha bħalissa qed jirċievi kura għall-paranojja u d-demenzja. Meta ġiet murija s-sikkina li allegatament heddiha biha, il-mara qalet: “Ma kienx kapaċi jagħmel xi ħaġa biha,” u spjegat li hu kien qed heddidha biex “ibeżżagħha.
Hija qalet li ma kellhiex bżonn protezzjoni minn żewġha u kienet tafdah. Qalet ukoll li xi kultant kienet tesaġera fuq żewġha. Id-difiża staqsiet lill-mara tiftakar x’ġara dakinhar li għamlet ir-rapport u tagħti kronoloġija. Il-mara qalet li minnufih ħasset li bdiet tesaġera fuq dak li għamlet fir-rapport. Qalet ukoll li dakinhar, it-tfal tagħha ħaduha f’lukanda sakemm missierhom jikkalma.
Wara, hija fittxet l-assistenza legali u ċemplet lill-avukat tagħhom li kien għenhom f’każ preċedenti. Żiedet tgħid li kienet taf lill-avukat għaliex żewġha kien għamel rapport kontra binhom li spiċċa l-ħabs. “Għaddejna minn trawma kbira minħabba ibni. Bdejna nħossuna mtaqqlin,” qalet il-mara.
Wara li l-mara temmet x-xhieda tagħha, il-prosekutur oġġezzjona għat-talba biex il-każ jiġi rtirat, u qal li kien hemm biża’ ġenwina li jseħħu każijiet simili fil-futur. L-Avukat mill-Uffiċċju tal-Avukat Ġenerali Jurgen Dalli qal li l-akkużi u x-xhieda tal-mara “ma jagħtux ċertezza li m’hemmx periklu għal saħħitha”.
Il-Qorti ċaħdet it-talba biex jitwaqqaf il-każ u ordnat li l-proċeduri jkomplu. Fil-konklużjoni tagħha, il-Maġistrat osservat li mit-testimonjanza tagħha rriżulta li l-mara kienet persuna “vulnerabbli” li ġġustifikat l-imġiba ta’ żewġha. Il-Qorti żiedet tgħid li spiss, vittmi allegati jagħżlu li jirtiraw l-akkużi, u li ħafna drabi l-vittmi jġorru sens ta’ ħtija jew mistħija jekk ma jirtirawx il-kawża kriminali.
