Il-movimenti ta’ vapur tal-gwerra minn zona ta’ baħar magħrufa bħala Taiwan Strait ikkaġunaw tensjoni ġdida bejn iċ-Ċina u r-Renju Unit… Dan fost l-akkużi minn Beijing li l-Britanniċi u bagħtu l-bastiment HMS Spey ‘apposta’ f’dik iz-zona, bil-ħsieb li ‘joħolqu l-inkwiet’.
Min-naħa tiegħu, ir-Renju Unit ċaħad kategorikament li kien qed jaħseb biex jipprovoka liċ-Ċina waqt sitwazzjoni mill-aktar sensittiva fir-reġjun tat-Tajwan…il-gżira-Stat sovran u demokratiku li Beijing jinsisti li għandha tifforma parti miċ-Ċina.
Ir-Royal Navy, fl-aħħar sigħat, ħareġ stqarrija li l-HMS Spey, bħala wieħed mill-patrol vessels tal-qawwiet marittimi Britanniċi, kien sempliċiment għaddej b’missjoni rutina ta’ navigazzjoni minn dik ir-rotta ta’ baħar u bħala parti mill-istazzjonar tal-vapuri tar-Renju Unit fiz-zona li qed isir ukoll b’rispett għal-liġi internazzjonali.
L-aħħar darba li bastiment tal-gwerra tar-Renju Unit kien għadda mit-Taiwan Strait inzertat fl-2021 meta l-HMS Richmond kien qed jivvjaġġa mill-Baħar Ċiniż tal-Lvant fi triqtu lejn il-Vjetnam.
U fl-aħħar sigħat, kelliema għall-Armata għal-Liberazzjoni tal-Poplu Ċiniż qalu li l-eżerċizzju b’HMS Spey kien intenzjonat bħala ‘sfida’ – u fost il-konferma li l-qawwiet marittimi taċ-Ċina kienu segwew kontinwament il-movimenti tal-vapur Britanniku.
Iċ-Ċina qalet ukoll li ‘il-Britanniċi qed jippruvaw iqarrqu bil-versjoni tagħhom dwar kif żvolġa l-inċident u fost l-abbużi għall-prinċipji legali’. L-akkuża kompliet li ‘l-azzjonijiet tar-Royal Navy kienu intenzjonati biex joħolqu l-inkwiet u jipperkolaw il-paċi u l-istabbilità fit-Taiwan Strait’.
Intant, il-kelliema f’Beijing sostnew li l-militar Ċiniż f’dik iz-zona jinsab fuq stat ta’ allert kontinwu u li hu dejjem lest biex iwieġeb għal kwalunkwe theddid u każi ta’ provokazzjoni.
