Il-Qorti tal-Ewwel Istanza (Ġurisdizzjoni Kostituzzjonali), preseduta mill-Imħallef Henri Mizzi, ċaħdet rikors kostituzzjonali urġenti mressaq minn Daniel Muka, li qed jiġi proċessat quddiem ġurija fuq l-akkuża tal-qtil ta’ Christian Pandolfino u Ivor Piotr Maciejowski f’Awwissu 2020.
Huwa kien talab biex l-Avukat Mario Mifsud ikollu iktar ċans li jistudja l-każ u għalhekk id-difiża tkun aħjar. Muka kien talab miżura interim biex jiġu sospiżii l-proċeduri kriminali li għaddejjin kontrih, fuq il-bażi li nkisru d-drittijiet tiegħu għal smigħ ġust, peress li d-difiża tiegħu ma kinitx ippreparata biżżejjed.
Il-ġuri kontra Muka u Viktor Dragomanski beda fis-16 ta’ Ġunju 2025, fejn iż-żewġ imputati qed jiġu akkużati bil-qtil b’mod kiesaħ u bla ħniena ta’ Pandolfino u Maciejowski fil-residenza tagħhom, fi Triq Locker, f’Tas-Sliema fl-18 ta’ Awwissu 2020.
Muka fetaħ kawża kostituzzjonali fis-17 ta’ Ġunju 2025, fejn allega ksur tad-dritt tiegħu għal ġuri ġust taħt il-Kostituzzjoni ta’ Malta u l-Artikolu 6 tal-Konvenzjoni Ewropea tad-Drittijiet tal-Bniedem. Hu sostna li l-avukat privat il-ġdid tiegħu, Mario Mifsud, kien ġie maħtur tlett ijiem biss qabel il-bidu tal-ġuri, u għalhekk ma kellux biżżejjed ħin biex jipprepara d-difiża.
Muka spjega li kien qed jaffaċċja diffikultajiet biex isib avukat privat minħabba kawża ċivili pendenti mal-avukat preċedenti tiegħu. Qal ukoll li oppona ripetutament li jkun rappreżentat minn avukat b’għajnuna legali, u għalhekk ma setax jaċċetta l-għajnuna ta’ avukati tal-Istat.
Sostna li kellu jingħata mill-inqas 20 jum sabiex l-avukat il-ġdid jipprepara ruħu, u fakkar li kienet saret talba għal dewmien fl-ewwel jum tal-ġuri, li iżda ġiet miċħuda mill-Qorti Kriminali. Wara li eżaminat id-dokumenti, il-Qorti Kostituzzjonali osservat li l-fatti ppreżentati minn Muka kienu imprecisi u mhux kompleti.
Filwaqt li l-imputat verament esperjenza diffikultajiet biex isib avukat, ir-rekords tal-Qorti juru li mill-inqas sa minn Marzu 2024 kellu diversi opportunitajiet biex jaħtar difiża privata. Il-Qorti kkonstatat li d-data tal-ġuri kienet ġiet stabbilita f’April 2025, u li Muka kien ġie infurmat bil-ħin kollu.
Ma kienx hemm ebda prova li l-imputat ġie impedut milli jaħtar avukat aktar kmieni, u anzi kien irrifjuta li jikkopera ma’ żewġ avukati b’għajnuna legali li kienu tqabbdu għalih matul il-proċeduri preliminari. Barra minn hekk, il-Qorti nnotat li Muka ma ppreżentax ebda prova ġurata biex jappoġġja l-allegazzjoni li pprova jimpjega avukati oħra, iżda ma rnexxilux.
B’hekk, il-Qorti kkonkludiet li ma kien hemm l-ebda ksur tad-dritt għal ġuri ġust, u għalhekk ċaħdet it-talba għal sospensjoni tal-ġuri.
Għaldaqstant il-proċeduri kriminali se jibqgħu għaddejjin kif ippjanat.
