Raġel ta’ 41 sena ġie miċħud il-ħelsien mill-arrest it-Tlieta wara li kien akkużat li hedded lill-eks sieħba tiegħu u kkawżalha biża’ li seta’ juża vjolenza kontrieha jew fuq il-proprjetà tagħha.
Il-każ tressaq quddiem il-Maġistrat Abigail Critien. Il-prosekuzzjoni tmexxiet mill-Ispettur Christian Cauchi, filwaqt li l-akkużat kien assistit mill-Avukat tad-Difiża Nadya Fiott, li qed isservih permezz tal-għajnuna legali.
L-Ispettur Cauchi spjega li l-mara ressqet rapport mat-Taqsima tal-Vjolenza Domestika tal-Pulizija nhar il-Ħadd. Ir-raġel u l-mara kienu f’relazzjoni minn Ottubru ’l hawn, iżda matul dan il-perjodu r-raġel kien qatta’ xi żmien il-ħabs, kien bla xogħol u kellu problema tal-vizzju tad-droga.
Minħabba l-qagħda tiegħu, il-mara kienet saħansitra xtatlu karozza biex jużaha bħala taxi sabiex jaqla’ l-flus. Wara li r-relazzjoni spiċċat, kienu qablu li jiltaqgħu għand nutar biex jittrasferixxu r-reġistrazzjoni tal-karozza lura lilha. Madankollu, waqt li kienu għand in-nutar, qam argument u allegatament ir-raġel hedded li jaħraq il-karozza.
L-Ispettur Cauchi żied jgħid li l-akkużat kien spiss jitlob flus lill-mara biex jiffinanzja l-vizzju tiegħu tad-droga, u dan kien jidher ukoll minn diversi messaġġi li bagħtilha. Il-mara rrappurtat ukoll inċident ieħor li seħħ fid-7 ta’ Ġunju, meta allegatament ir-raġel heddidha bil-vjolenza jekk kienet tirraportah lill-pulizija, u widdibha li kellu ħbieb kemm ġewwa kif ukoll barra l-ħabs.
Ir-raġel tressaq akkużat li hedded lill-mara, li kiser żewġ kundizzjonijiet ta’ ħelsien mill-arrest, u li kkommetta reat waqt li kien għadu taħt sentenza ta’ libertà kkundizzjonata. Hu wieġeb mhux ħati għall-akkużi miġjuba kontrih. It-talba għall-ħelsien mill-arrest ġiet miċħuda u l-Qorti ħarġet ordni ta’ protezzjoni favur il-vittma allegata.
