L-Ordni Militari Sovran ta’ Malta (SMOM) ħabbar li Fra Francis J. Vassallo ġie maħtur għall-erba’ snin li ġejjin bħala Riċevitur tat-Teżor Komuni. Il-ħatra ta’ Fra’ Francis mill-Kunsill Sovran saret effettiva fit-23 ta’ Ġunju waqt l-aħħar sessjoni ordinarja tiegħu.
Fra’ Francis, Kavallier Profess fl-Ordni ta’ Malta, li qabel serva bħala President tal-Bord tal-Awdituri, iltaqa’ mal-impjegati tat-Teżor Komuni biex jistabbilixxi l-aspettattivi u jispjega l-prijoritajiet tiegħu għad-Dipartiment. Fabrizio Colonna, l-Eks Riċevitur, ressaq ir-riżenja tiegħu għal “raġunijiet personali” fit-20 ta’ Ġunju 2025.
Imwieled Malta fl-1948, Fra’ Francis ggradwa b’BA (Hons) fl-Ekonomija mir-Royal University of Malta fl-1969. Aktar tard ġie impjegat ma’ Chase Manhattan Bank f’Milan. Wara li temm il-Programm Internazzjonali ta’ Ġestjoni ta’ Chase, mar jaħdem fil-kwartieri ġenerali f’New York.
L-inkarigi internazzjonali tiegħu inkludew pożizzjonijiet fir-Repubblika Dominikana, New York, Londra, Ġinevra, Spanja u fl-Iżvizzera.
Fl-1993, inħatar Gvernatur tal-Bank Ċentrali ta’ Malta, u wara waqqaf il-kumpanija konsulenti finanzjarja tiegħu stess. Okkupa diversi pożizzjonijiet prominenti fis-settur bankarju f’Malta, inkluż Direttur mhux Eżekuttiv ta’ FIMBank, Chairman ta’ BAWAG Malta, u Chairman ta’ Mediterranean Bank. Ġie maħtur ukoll Ambaxxatur Speċjali ta’ Malta għall-Amerika Latina biex jinnegozja ftehimiet tat-taxxa f’isem Malta ma’ diversi pajjiżi fir-reġjun.
Fl-2009, Fra Francis ingħaqad mal-Ordni Militari Sovran ta’ Malta fl-2000. Inħatar Uffiċjal tal-Ordni ta’ Isabella la Catolica mir-Re Ġwanni Karlu ta’ Spanja u ngħata wkoll l-Ordni tal-Mertu mir-Repubblika ta’ Malta.
