F’ġurnata sħuna u mill-isbaħ fi tmiem ix-xahar ta’ Ġunju, il-palazz ta’ San Anton inbidel f’post ta’ ferħ u ispirazzjoni hekk kif saru l-premjazzjonijiet tal-Unur Papa Ġwanni XXIII.
Il-President ta’ Malta Myriam Spiteri Debono, laqgħet lil dawk preżenti għal din iċ-ċerimonja speċjali li tfakkar lil dawk li, b’mod sempliċi imma profond, jagħtu eżempju ta’ tjubija fil-ħajja ta’ kuljum.
Fiċ-ċentru ta’ din il-ġurnata speċjali kien hemm Julian Fenech – tifel tas-sitt sena minn Ħal Lija, magħruf fost sħabu għall-empatija u s-sens qawwi ta’ responsabbiltà lejn dawk ta’ madwaru.
Julian ġie magħżul bħala l-rebbieħ ta’ dan il-premju għal mod kif, sa minn età żgħira, irrappreżenta l-veru spirtu tal-ġentilezza u s-solidarjetà. Il-ġestijiet tiegħu mhumiex kbar f’dak li jidher, iżda jġorru valur kbir għall-komunità – jiftakar fi sħabu, jara x’jonqoshom, u jagħti mill-ftit li għandu, dejjem b’umiltà.
Il-President enfasizzat l-importanza ta’ din il-premjazzjoni bħala parti mill-viżjoni tagħha li l-Maltin u l-Għawdxin jibnu soċjetà aktar umli; waħda li timxi fuq l-għajnuna li n-nies jagħtu lil xulxin.
Hi saħqet illi atti bħal dawn jinkoraġġixxu tfal oħra biex jaraw lilhom infushom bħala nies li jistgħu jagħmlu differenza – u li dan iġib miegħu wkoll sens ta’ valur personali u fil-komunità.
Dan l-avveniment f’San Anton ma kienx biss ċerimonja ta’ premjazzjoni, iżda tifkira ħajja li anke t-tfal iż-żgħar jistgħu jkunu l-bidla li rridu naraw fis-soċjetà tagħna.
