Raġel ta’ 55 sena tilef ħajtu lbieraħ filgħaxija fil-bajja tal-Għadira, waqt li kien qed jgħum.
L-inċident seħħ għall-ħabta tas-6:30pm, meta l-Pulizija ġew infurmati li kien hemm bżonn l-assistenza tagħhom fuq il-post.
Mill-ewwel investigazzjonijiet irriżulta li r-raġel, residenti l-Mellieħa, sab ruħu f’diffikultà fil-baħar. Persuni li kienu fil-viċin raw x’kien qed jiġri u intervjenew biex itellgħuh mill-ilma, waqt li tawh l-ewwel għajnuna.
Tim mediku wasal immedjatament u r-raġel ittieħed l-Isptar Mater Dei b’ambulanza, iżda sfortunatament ġie ċċertifikat mejjet ftit tal-ħin wara.
Il-Maġistrat Joseph Mifsud ġie infurmat u fetaħ Inkjesta Maġisterjali, filwaqt li l-investigazzjonijiet tal-Pulizija għadhom għaddejjin sabiex jiċċaraw eżatt x’wassal għal din il-mewta traġika.
