L-Assoċjazzjoni tal-Impjegaturi Maltin (MEA) ġiet onorata bl-ewwel post waqt l-edizzjoni ta’ din is-sena tal-Premjijiet Nazzjonali għall-Appoġġ tan-Negozji (NSBA) – inizjattiva tal-Ministeru għall-Ekonomija, l-Intrapriża u l-Proġetti Strateġiċi flimkien mad-Dipartiment tal-Kummerċ u l-Kummissjoni Ewropea, li tirrikonoxxi organizzazzjonijiet li joffru sapport b’saħħtu lill-SMEs.
Din hija t-tieni sena konsekuttiva li fiha l-MEA ħadet l-ogħla rikonoxximent, din id-darba għall-proġett tagħha “Compass” – inizjattiva mmirata biex tgħin lill-impjegaturi jadattaw għat-tibdil demografiku f’Malta.
Il-proġett COMPASS, li beda fl-2017, jindirizza kwistjonijiet relatati ma’ tnaqqis fil-fertilità, popolazzjoni li qed tixjieħ, u d-dipendenza li dejjem qed tkompli tikber fuq ħaddiema barranin. Permezz ta’ riċerka bbażata fuq data, involviment ta’ stakeholders, suġġerimenti ta’ riformi konkreti u pressjoni politika kostruttiva, l-MEA rnexxielha tressaq dawn it-temi b’mod serju fuq l-aġenda nazzjonali.
Il-proġett mhux biss ġibed l-attenzjoni dwar dawn l-isfidi, iżda ppropona wkoll strateġiji konkreti u moderni biex jiġi msaħħaħ l-ambjent tan-negozju Malti quddiem nuqqas ta’ ħaddiema u talent lokali.
