Numru ta’ persuni kellhom jittieħdu l-isptar wara splużjoni qawwija li seħħet f’pompa tal-petrol fil-kapitali Taljana, Ruma.
Il-każ seħħ kmieni dalgħodu, għall-ħabta tat-8:45am, meta l-ewwel żviluppa nar waqt li kien qiegħed jinħatt xi fuel. Imbagħad, kien hemm l-isplużjoni li ħafna iddeskrivewha qisha “terremot qawwi”.
Mal-isplużjoni dehret daħna kbira sewda, li ksiet parti kbira minn Ruma.
Fost dawk feruti hemm wieħed mill-pumpieri u tmien membri tal-Pulizija li waslu fil-post mal-ewwel, malli ġie rappurtat in-nar li żviluppa f’din il-pompa.
Wieħed mill-feruti jinsab f’kundizzjoni gravi.
Intant, l-isplużjoni fiz-zona tant kienet qawwija li ħalliet ħsarat kbar anke f’binjiet li jinsabu fil-viċinanzi.
