Żewġ nisa Kolombjani tressqu separatament il-Qorti wara inċident li seħħ f’Paceville fis-sigħat bikrin tat-Tnejn li għadda. Waħda minnhom ammettiet l-akkużi u ngħatat sentenza sospiża, filwaqt li l-oħra ċaħdet l-akkużi u nżammet taħt arrest preventiv.
Il-każ seħħ wsara s-sagħtejn ta’ filgħodu, meta l-Pulizija kellhom jintervjenu fi ġlieda verbali fi Triq San Ġorġ, f’Paceville. Skont l-Ispettur tal-Pulizija Jonathan Cassar, wara li l-Pulizija ppruvaw jikkalmaw is-sitwazzjoni, Maribel Piedrahita Serna, ta’ 25 sena, spiċċat toħroġ is-suba’ tan-nofs lejn il-Pulizija.
Meta l-uffiċjali resqu lejha biex jitolbu d-dettalji tagħha, hi rrifjutat li tagħti l-informazzjoni mitluba u spiċċat tgħajjarhom, theddidhom u tirreżisti l-arrest tagħha. Matul dan l-inċident, Katherin Vanessa Torres Castano, ta’ 19-il sena, allegatament tgħat daqqa ta’ ponn lill-kuntistabbli tal-Pulizija u kkaġunatilha ġrieħi ħfief.
Fil-Qorti, Piedrahita Serna kienet akkużata b’offiża u theddid lil uffiċjali pubbliċi, nuqqas ta’ obbedjenza għal ordnijiet leġittimi tal-Pulizija, reżistenza għall-arrest, ksur tal-paċi pubblika u stat ta’ sakra fil-pubbliku. Wara li inizjalment qalet li ma tafx kif se twieġeb għall-akkużi, bidlet il-pożizzjoni tagħha fi żmien ftit minuti u ammettiet il-ħtija tagħha.
Il-Qorti wissiet li l-ewwel akkuża biss tista’ ġġorr magħha piena ta’ priġunerija effettiva u multa bejn €1,200 u €7,500. Wara li l-każ ġie sospiż għal ftit ħin, Piedrahita Serna kkonfermat il-ħtija.
Kemm il-prosekuzzjoni kif ukoll id-difiża qalu li sentenza sospiża u multa baxxa kienu xierqa f’dal-każ. L-Ispettur Cassar għamel referenza għall-fatt li, wara l-ġudizzju, il-mara kienet se tiġi riferita lill-Pulizija tal-Immigrazzjoni biex tintbagħat lura pajjiżha, u staqsa kif se titħallas il-multa.
L-avukat tad-difiża Axl Camilleri sostna li għalkemm il-klijenta tiegħu għamlet ġest indeċenti u weġġgħet lill-Pulizija bil-kliem tagħha, sentenza ta’ ħabs ma kinitx xierqa. Huwa ppropona li l-multa titħallas minnufih u jekk dan ma jiġrix, din tinbidel f’sentenza ta’ priġunerija, li matulha l-mara tista’ torganizza l-ħlas.
Il-Qorti, preseduta mill-Maġistrat Rachel Montebello, tat sentenza sospiża lill-mara u multa, iżda d-dettalji eżatti ma ġewx spjegati fil-miftuħ. Minn naħa tagħha, Torres Castano kienet akkużata bl-istess reati, iżda wkoll li kkaġunat ġrieħi ħfief lil kuntistabbli tal-Pulizija. Hi wieġbet mhux ħatja.
L-avukat tagħha, Sarah Ciliberti, talbet għall-ħelsien mill-arrest, iżda l-prosekuzzjoni oġġezzjonat. L-Ispettur Cassar spjega li Torres Castano qalet fl-istqarrija tagħha li kienet fuq btala, u għalhekk kien hemm biża’ li taħrab.
Żied jgħid li l-proċeduri kienu għadhom fil-bidu u kien għad fadlilhom xhieda ċivili jixhdu, inkluż sieħeb tas-sigurtà li fih beda l-argument kollu. Il-Qorti ċaħdet it-talba għall-ħelsien mill-arrest u ordnat li Torres Castano tinżamm taħt arrest preventiv.
