L-Eks Segretarju Ġenerali tal-Partit Laburista, Jimmy Magro, reġa’ spiċċa l-Qorti fejn ġie akkużat bi frodi relatata ma’ użu ħażin ta’ fondi tal-Unjoni Ewropea, li jingħad li jammontaw għal madwar €20,000. Magro wieġeb mhux ħati għall-akkużi miġjuba kontrih.
Il-każ jirrigwarda l-perjodu bejn l-2010 u l-2015, iżda l-informazzjoni pprovduta waqt id-dehra fil-Qorti kienet waħda limitata. Id-difiża indikaw li jistgħu jqajmu kwistjoni ta’ preskrizzjoni f’seduta futura, wara li janalizzaw b’mod aktar profond l-akkużi differenti li qed jiffaċċja l-akkużat, li tressaq b’ċitazzjoni.
Kevin Calleja, rappreżentant mid-Dipartiment tal-Verifika Interna u Investigazzjonijiet (IAID), xehed fil-Qorti u ppreżenta rapport ta’ investigazzjoni finanzjarja dwar allegazzjonijiet ta’ użu manipulat ta’ fondi minn Assoċjazzjoni tal-Kunsilli Lokali. Ir-rapport kien ġie sottomess f’Ġunju 2016 lill-Eks Avukat Ġenerali Peter Grech.
F’April li għadda, Magro kien instab ħati f’każ separat ta’ korruzzjoni relatat ma’ sħubija privata f’kumpanija li ġestiet proġetti ta’ restawr fil-Forti Sant’Anġlu, fejn ingħata sentenza ta’ erba’ snin u tmien xhur ħabs. Dik is-sentenza qed tiġi appellata, u Magro għadu ma bediex jiskonta l-piena u dan sakemm jinstema’ u jiġi deċiż l-appell.
Magro nstab ħati ta’ ‘trading in influence’ u korruzzjoni. Fil-każ l-ieħor, l-eks politiku kien instab ħati li talab tixħim ta’ €25,000 bi skambju li għen lil applikant jikseb kuntratt pubbliku ta’ €250,000 għal tagħmir għall-ġbir tal-iskart fl-2014.
Dak iż-żmien, Magro kien konsulent speċjali tal-Assoċjazzjoni tal-Kunsilli Lokali. L-applikant li naqas, jirrifjuta li jħallas il-flus u sussegwentement ippreżenta diversi rapporti dwar l-allegat attentat ta’ tixħim, inkluż il-laqgħa mal-Prim Ministru ta’ dak iż-żmien Joseph Muscat.
L-applikant xehed li Muscat kien qallu b’rabja “Tiġix għandi b’dawn l-affarijiet” u kien għaffeġ imejl stampat li kien tah bħala prova. Ir-rapporti kontinwi tiegħu dwar Jimmy Magro eventwalment waslu għand il-Kummissjoni Permanenti Kontra l-Korruzzjoni, li fl-2018 qalet li kienet “moralment konvinta” li Magro talab tixħim.
Il-każ riċenti ta’ frodi fuq il-fondi tal-UE mistenni jkompli aktar tard din il-ġimgħa. Is-smigħ kien ippresedut mill-Maġistrat Giannella Camilleri Busuttil. Il-prosekuzzjoni tmexxiet mis-Supretendent Rennie Stivala, filwaqt li l-avukati Franco Debono, Michael Sciriha u Roberto Spiteri dehru għall-akkużat.
