Raġel ta’ 28 sena tressaq il-Qorti t-Tlieta waranofsinhar akkużat li stupra lill-eks sieħba tiegħu u li fastidjaha permezz ta’ messaġġi. Huwa wieġeb mhux ħati għall-akkużi miġjuba kontrih u ngħatat ordni ta’ protezzjoni fil-konfront tal-vittma.
Il-każ beda fit-6 ta’ Lulju għall-ħabta tal-10pm, meta l-mara marret fit-Taqsima tal-Vjolenza Domestika biex tirrapporta lill-eks sieħeb tagħha, li hu wkoll missier it-tifel jew tifla tagħhom li għadu minor. Hija allegat li bejn Ġunju u Lulju, ir-raġel kien qed jibgħatilha messaġġi ta’ fastidju.
Skont l-Ispettur tal-Pulizija Sherona Buhagiar, il-mara rrappurtat ukoll inċident separat li allegatament seħħ fit-30 ta’ Marzu, meta l-koppja kienu għadhom flimkien. Dakinhar, ir-raġel allegatament xebagħha bis-saqajn fiż-żaqq, imbuttaha taħt id-doċċa, qabadha u stupraha.
Wara li għaddiet minn assessment tar-riskju, ir-riżultat tagħha kien 19 minn 20, ikklassifikat bħala “riskju għoli”. Il-Pulizija reġgħu sejħu lill-mara biex tixhed nhar it-Tnejn li għadda, din id-darba fil-preżenza ta’ ħaddiema soċjali. Ir-raġel, li kien ġie arrestat f’Għawdex, kien eskortat lejn Malta u tressaq il-Qorti f’Malta l-għada.
Huwa ġie akkużat bi stupru, detenzjoni kontra l-volontà tal-vittma, atti sesswali mingħjar kunsens u li kkawża biża’ ta’ vjolenza fuq il-vittma. Hu wieġeb mhux ħati u talab għall-ħelsien mill-arrest.
Kemm il-prosekuzzjoni kif ukoll id-difiża talbu biex l-ismijiet tal-partijiet ma jiġux ippubblikati. Il-Qorti laqgħet it-talba fuq bażi ta’ sensittività, speċjalment fil-konfront tal-vittma u t-tifel minuri. Madankollu, irrimarkat li m’hemmx dispożizzjoni speċifika fil-liġi biex toħroġ projbizzjoni fuq l-isem tal-akkużat.
Ordni ta’ protezzjoni ġiet maħruġa favur il-vittma. Id-difiża, immexxija mill-Avukat Robert Piscopo, qalet li l-akkużat ma kellux storja kriminali u li kien beda proċeduri biex jibda jara lil ibnu ftit tal-ġranet qabel ir-rapport tal-mara.
Il-prosekuzzjoni, rappreżentata mill-Avukati tal-Avukat Ġenerali Cynthia Tomasuolo u Kristina Bartolo, oġġezzjonat għat-talba għall-ħelsien mill-arrest, billi l-vittma għadha ma xehditx. Il-Qorti, wara li semgħet lis-sehmi tal-partijiet, ċaħdet it-talba għall-ħelsien mill-arrest u ordnat li l-akkużat jinżamm arrestat.
Il-vittma kienet assistita mill-Avukat Edward Gatt.
