Helen Gauci
Eks Sindku Kunsill Lokali
Ħal Għargħur
Kienet ġurnata li qatt ma kont nimmaġina li ngħix bħala Sindku elett tal-poplu ta’ Ħal Għargħur, ġurnata fejn mhux id-deċiżjoni tal-poplu, imma logħob ta’ poter u interessi moħbija wasslu biex neħħewni minn Sindku.
Kienet ġurnata fejn mhux il-ġustizzja ħadet il-kelma finali, imma l-makkinarju politiku mimli kalkoli u konfoffa li, taħt it-tmexxija ta’ Robert Abela u l-Partit Laburista, għamel minn kollox biex jiskatta sfiduċja u jneħħi lili minn Sindku li kont qed naħdem għar-raħal, u mhux għall-Partit.
Jien kont eletta b’mandat ċar mill-poplu ta’ Ħal Għargħur. Mandat li ma kienx biss ċifra fuq karta, imma fiduċja konkreta li wriet kemm in-nies xtaqu tmexxija ġusta, nadifa, u trasparenti.
Tul is-snin li għamilt bħala Sindku, ħdimna fuq proġetti li verament għamlu differenza: mill-ħarsien tal-karattru storiku tar-raħal, sa titjib infrastrutturali u miżuri li daħħlu aktar trasparenza fil-Kunsill Lokali.
Imma dan kollu jidher li ma niżelx tajjeb ma’ min qed jara kull lokalità bħala pedina fil-logħba politika tiegħu. Ladarba bdejna nosservaw aktar pressjoni minn ċerti nies qrib il-Gvern, beda jidher li l-għan tagħhom ma kienx li jtejbu Ħal Għargħur, imma li jkollhom kontroll fuq il-Kunsill; kontroll li jservi lill-Partit Laburista, mhux lir-raħal.
Il-vot ta’ sfiduċja ma ġiex għax kont nieqsa minn ħidma jew għax kont naġixxi kontra l-interess pubbliku. Ma kienx bażat fuq nuqqas ta’ tmexxija, imma fuq kalkolu politiku. Dan kollu ġie ppjanat bil-għaqal, b’min qiegħed jippretendi li għandu l-mandat biex jikkontrolla kollox – anke jekk dan ifisser li jkissru l-prinċipji fundamentali tad-demokrazija lokali.
Ħafna mit-twissijiet li ksibt fil-ġimgħat qabel l-isfiduċja kienu ġejjin minn persuni li lesti jimxu mal-linja ta’ Partit Laburista akkost ta’ kollox.
Allegazzjonijiet foloz
Saru allegazzjonijiet foloz, ġiet miżmuma informazzjoni, u ġew manipulati s-sentimenti ta’ xi kunsillieri biex imorru kontra l-ġid komuni.
Qed ngħid dan b’sens ta’ diżappunt, mhux għax titlef pożizzjoni – imma għax qed nara kemm l-istituzzjonijiet lokali saru vulnerabbli għal dan it-tip ta’ immaniġġjar u intromissjoni minn fuq.
Din mhix sempliċement storja personali. Din hi storja li għandha tbeżża’ lil kull min jemmen fil-governanza tajba. Illum kont jien, imma għada jista’ jkun sindku ieħor – xi ħadd ieħor li ma jridx jimxi mal-linja tagħhom u allura jinqala’ minn nofs biex jagħmlu wisa’ għal wieħed tagħhom.
Dak li ġara f’Ħal Għargħur mhux każ iżolat. Rajna kemm-il darba kif, taħt it-tmexxija ta’ Robert Abela, il-Partit Laburista juża l-poter biex jimmarginalizza l-oppożizzjoni anke fuq livell lokali. Meta tmexxija ma tagħmilx distinzjoni bejn istituzzjoni u partit, allura tkun f’periklu s-sinsla tad-demokrazija tagħna.
Lil dawk kollha li appoġġjawni, ngħidilkom grazzi mill-qalb. Il-ġlieda għad-dritt u għall-prinċipji mhi qatt battalja li tintilef għalkollox, anke jekk tintilef pożizzjoni. Jien se nibqa’ nitkellem, niġġieled u nservi lin-nies ta’ Ħal Għargħur… jekk mhux bħala Sindku, bħala ċittadin li jimpurtah mill-ġid komuni u mill-verità.
Fl-aħħar mill-aħħar, l-istorja tagħmel ġustizzja. U meta l-verità toħroġ – kif dejjem jiġri – in-nies jagħrfu min verament kien qed jaħdem għalihom u min uża l-poter biex jagħmel l-oppost.
Dan l-artiklu deher f’Il-Mument tal-Ħadd 6 ta’ Lulju, 2025.
