Id-dinja mill-ġdid qed tikkundanna l-qtil indiskriminattiv tal-Palestinjani f’Gaza…Palestinjani – irġiel, nisa u tfal — li qed jissugraw li jisfaw mira tal-militar Iżraeljan huma u jistennew għall-ikel viċin iċ-ċentri għad-distribuzzjoni tal-għajnuna fit-territorju.
Fil-fatt, fl-aħħar sigħat kien ikkonfermat li talanqas 35 Palestinjani oħra nqatlu mit-tiri sparati lejhom waqt li kienu fi triqthom lejn wieħed minn dawn iċ-ċentri.
Sadanittant, il-gwerra bejn Iżrael u t-terroristi Palestinjani tal-Ħamas mhix tnaqqas mill-intensità – bil-qawwiet Iżraeljani jikkonċentraw mill-ġdid l-attakki fuq il-bażijiet tat-terroristi…Attakki li fihom inqatlu wkoll numru sinifikanti ta’ Palestinsjani, inklużi tfal.
Kelliema għall-Organizzazzjoni tas-Salib l-Aħmar qalu l-isptar li huma qed imexxu f’Rafah – iz-zona tal-aħħar attakki — kien qed idaħħal l-akbar influss ta’ katavri għal sena sħiħa….Dan meta kienu reġistrati wkoll ‘il fuq minn 100 midruba f’anqas minn sagħtejn ta’ ostilitajiet fiz-zona.
Intant, il-35 Palestinjani maqtula li ssemmew fil-bidu tar-rapport inzertaw viċin ċentru għad-distribuzzjoni tal-ikel fil-limiti ta’ Rafah, lejn in-nofsinar ta’ Gaza…Ċentru mmexxi mill-Gaza Humanitarian Foundation (GHF) li hu grupp Iżraeljan responsabbli mil-loġistika.
Il-gwerra f’Gaza, issa, ilha għaddejja għal 21 xahar u meta fil-preżent hemm ‘il fuq minn żewġ miljun Palestinjani li qed jiddependu fuq l-għajnuna li qed tasal fit-territorju minn barra…Dan ukoll meta l-esperti dwar is-sigurtà tal-ikel qed ikomplu jwissu dwar kriżi tal-ġuh ‘akuta u kontinwa’ fl-artijiet ta’ Gaza.
L-Uffiċjali tas-Salib l-Aħmar, fl-istess ħin, ikkundannaw ‘il-frekwenza u l-iskala’ tal-isparaturi viċin is-siti għat-tqassim tal-ikel u li dejjem qed iħallu kwantità ta’ ċivili Palestinjani mejtin.
Hu minnu wkoll li mhux faċli biex wieħed jivverifika l-fatti, meta Iżrael lanqas mhu qed jippermetti biex il-ġurnalisti barranin ikollhom aċċess lejn Gaza.
L-Iżraeljani, fl-aħħar sigħat, qalu li s-suldati tagħhom kienu sparaw it-tiri ta’ twissija waqt li l-folol tal-Palestinjani kienu qed jaġixxu b’mod suspettuż viċin iċ-ċentri għat-tqassim tal-ikel. Huma tennew ukoll li ma kellhomx id-dettalji dwar il-vittmi rappurtati.
Sadanittant, is-sorsi internazzjonali anki kundannaw l-attakki mill-ajru li sar tard fil-lejl tas-Sibt fuq Deir al-Balah u li ħallew it-tfal fost il-vittmi. Dan ukoll waqt li l-Iżraeljani komplew bl-attakki mill-ajru intensivi fuq iz-zona ta’ Beit Hanoun, fin-naħa ta’ fuq ta’ Gaza.
Għalissa għad ma hemmx sinjali ta’ xi żblokk notevoli fit-taħditiet dwar waqfien mill-ġlied potenzali fil-Medda ta’ Gaza…Dan minkejja li l-President tal-Istati Uniti, Donald Trump – li pajjiżu hu wieħed mill-medjaturi – sostna, il-ġimgħa l-oħra li ‘kien viċin’ li jikkonkludi forma ta’ patt bejn l-Iżraeljani u l-Ħamas.
Diversi sorsi Palestinjani qed jgħidu li Iżrael qed iżomm lura l-proċess għaliex ma jridx jaċċetta t-talbiet tal-Ħamas biex jirtira għal kollox lit-truppi tiegħu mill-Medda ta’ Gaza.
Dan waqt li sorsi oħrajn qalu, fil-lejl tas-Sibt, li l-medjaturi kienu talbu lil Iżrael u l-Ħamas biex jipposponu t-taħditiet sal-wasla, fil-Qatar, ta’ Steve Witkoff, bħala r-Rappreżentant Speċjali tal-Istati Uniti għal-Lvant Nofsani.
Sadanittant, il-kriżi tal-ġuh f’Gaza mistennija taqleb għall-agħar meta n-Nazzjonijiet Uniti u gruppi tal-għajnuna oħrajn qed isibuha diffiċli ħafna biex jiddistribwixxu l-għajnuna umanitarja…L-akbar intoppi, għalissa, huma r-restrizzjonijiet imposti mill-militar Iżraeljan u sitwazzjoni fuq livell ta’ anarkija fost ir-residenti ta’ Gaza.
