It-tielet u l-aħħar tiġrija fiċ-ċikliżmu tal-Kampjonat Nazzjonali tat-Time Trial

Aidan Buttigieg ta’ Team Polti Visit Malta rebaħ  it-tielet u l-aħħar tiġrija tal-Kampjonat Nazzjonali tat-Time Trial, wieħed miż-żewġ kampjonati organizzati mill-Federazzjoni Maltija taċ-Ċikliżmu. Kampjonati li saru fil-Miżieb fejn iċ-ċiklisti kollha għamlu dawra ta’ 1.1km.

Aidan Buttigieg temm l-ewwel fl-Elite f’ħin rekord ta’ 2 minuti :13.49 sekondi qabel Jacob Schembri u John Camilleri, it-tnejn ta’ Bike It Up Racing. Diana Muscat ta’ Team Greens rebħet il-kategorija tan-Nisa fi 3 minuti u 19.65 sekondi qabel Michelle Vella Wood wkoll ta’ Team Greens u Lindsey Pirotta ta’ D Sports Lab.

Fil-Masters 40+ dominju minn ċiklisti tat-Team Greens Joaquin Rojas, Arek Kawalec u Gesred Borg filwaqt li David Cushing ta’ Bike It Up Racing rebaħ il-Kategorija Masters 50+

Ryan Gatt ta’ The Cyclist by Agones rebaħ il-Kategorija Juniors, Ethan Grech ta’ Mosta CC  dik ta’ Taħt 16-il sena, u Rihanna Hassan ta’ Team Greens Taħt 16-il sena nisa.

Neil Cassar ta’ Shamrock Stars u Katie Anne Vella Wood ta’ Team Greens rebħu l-kategoriji Taħt l-14-il sena filwaqt li Kruiven Farrugia u Zaliya Dimech, it-tnejn ta’ Shamrock Stars, rebħu l-kategoriji Taħt it-12-il sena.