Tasal il-konferma uffiċjali tal-istorja li l-bieraħ filgħodu il-paġna soċjali ta’ Replay żvela b’mod esklussiv. L-internazzjonali Malti, Paul Mbong se jkun qed jilgħab fis-Super liga Srbije, fl-ogħla diviżjoni Serba, mal-klabb ta’ FK Cukaricki.
B’hekk dak żvelat minn Replay il-bieraħ, kien ikkonfermat l-għada hekk kif il-plejer iffirma kuntratt ma’ dan il-klabb, li tul in-negozjati mal-klabb Serb kien mgħejjun mir-rappreżentat tiegħu, l-avukat Luigi Fenech.
FK Cukaricki hu wieħed mit-timijiet Serbi f’dan il-Kampjonat li kellu stabilitá sena wara l-oħra, billi fl-aħħar 13-il sena konsekuttivi dejjem lagħab fis-Super liga Srbije.
L-iskwadra li hi mmexxija mill-eks kowċ nazzjonali Serb ta’ taħt is-17-il sena, Milan Lesnjak. F’Kampjonat Serb li hu kompost minn 16-il tim, f’termini ta’ valur finanzjarju ta’ plejers, FK Cukaricki hu meqjus bħala s-sitt l-aktar tim li jiswa’ flus, bi ftit anqas minn €13-il miljun.
Mbong li, fl-aħħar staġuni kien qed jilgħab f’Malta ma’ Birkirkara, se jkun qed jibda dik li se tkun l-ewwel esperjenza tiegħu barra minn pajjiżna.
Mbong, li f’Settembru li ġej jagħlaq 24 sena, diġa’ lagħab ‘il fuq minn 30 partita mat-tim nazzjonali Malti u skorja żewġ gowls. Fir-rwol ta’ winger fuq il-lemin, Mbong diġa’ lagħab mal-130 partita fl-ogħla diviżjoni Maltija u skorja 13-il gowl.
Hu mifum li fl-aħħar ġimgħat kien hemm diversi klabbs barranin li kienu qed juru interess f’Mbong, iżda kien biss il-bieraħ, li għall-ewwel darba ħadna indikazzjoni fejn kienet se tkun id-destinazzjoni taż-żagħżugħ internazzjonali Mali, Mbong meta grazzi għall-istorja esklussiva ta’ Replay, permezz tal-paġna soċjali tant popolari mad-dilettanti tal-futbol lokali, sirna nafu li l-eks plejer ta’ Birkirkara kien viċin li jiffirm ma’ klabb fl-ogħla diviżjoni Serba.
