Żagħżugħ ta’ 24 sena minn Santa Luċija, Zenden Gafà, ġie kkundannat għal sentenza sospiża wara li ammetta li weġġa’ gravi raġel billi tah daqqa ta’ ponn barra m-nightclub Numero Uno, f’Ta’ Qali, kif ukoll li saq b’mod perikoluż u kkawża ħsarat lil karozza ta’ terza persuna.
Il-każ seħħ fil-lejl tal-20 ta’ Lulju, meta Gafà kien involut f’argument li eskala fi ġlieda, u li matulha ta daqqa fil-wiċċ lil raġel ieħor, li sofra ġrieħi gravi fi snienu. Wara l-ġlieda, huwa spiċċa biex saq b’mod perikoluż mill-inħawi, u tilef il-kontroll tal-karozza u baqa’ dieħel f’karozza oħra, li kienet proprjetà ta’ persuna oħra.
Meta tressaq il-Qorti t-Tlieta waranofsinhar, Gafà ammetta għall-akkużi miġjuba kontrih, fosthom li kkawża ġrieħi gravi, sewqan traskurat, u ħsara volontarja fil-proprjetà ta’ ħaddieħor.
Il-Maġistrat Ann Marie Thake kkunsidrat il-fatt li l-akkużat ammetta mill-ewwel, iżda enfasizzat ukoll is-serjetà tad-delitti, speċjalment il-vjolenza u l-mod kif saq fil-pubbliku wara ġlieda.
Il-Qorti kkundannatu għal 18-il xahar ħabs, sospiżi għal tliet snin, u mmultatu €500. Barra minn hekk, waqqfitu milli jsuq għal tliet xhur, bħala miżura ta’ prekawzjoni.
Il-prosekuzzjoni tmexxiet mill-avukat mill-uffiċċju tal-Avukat Ġenerali Miriayah Borg, assistita mill-Ispettur Joseph Mallia, filwaqt li l-akkużat kien assistit mill-avukat Kris Busietta.
