Il-Qorti semgħet kif ‘social worker’ irtirata, Victoria Scicluna, tat €14,000 lil ċertu Alexander Gialanze Whiteford, raġel li kienet ilha tgħin għal kważi 25 sena biex jerġa’ jqum fuq saqajh. Hija rrakkuntat kif kienet temmen fih u tatu l-flus mingħajr kuntratt, iżda wara li qrat fuq il-midja li kien akkużat li qarraq €167,000 mingħand mara anzjana oħra, iddeċidiet li tagħmel rapport mal-pulizija.
Scicluna spjegat li Gialanze Whiteford kien qalilha li kellu bżonn jixtri laptop, iħallas il-kera u jħallas għall-karozza tiegħu. Qalet li rċeviet ukoll €35,000 mingħandu biex iżżommhom siguri, iżda minnhom żammet €10,000 bħala parti mid-dejn li kien fadallu magħha. Wara li tkellmet mal-Pulizija, waqqfet kull kuntatt miegħu, minkejja li huwa pprova jagħmel kuntatt magħha permezz ta’ persuni oħra.
Il-każ jinkludi wkoll donazzjoni ta’ €100,000 li l-allegata vittma tat lil Whiteford b’mod volontarju, kif ikkonfermat min-nutara Maria Mifsud Bonnici. Whiteford u l-ko-akkużat Andre Frendo qed jiffaċċjaw akkużi ta’ frodi u approprjazzjoni indebita, iżda qed jinsistu li huma mhux ħatja. Il-proċeduri għaddejjin quddiem il-Maġistrat Leonard Caruana.
Minn dak li ħareġ fil-Qorti hekk kif Whiteford kien ingħata l-pleġġ fuq każ li kellu l-Qorti huwa rnexxielu jikkonvinċi lil Scicluna biex tagħtih €100,000 permezz ta’ donazzjoni biex jibda negozju. Wara tagħtu €55,000 oħra għall-istess għan. Il-fondi nġibdu mill-kontijiet tagħha b’mod gradwali u ngħataw lil Frendo biex dan jgħaddihom lil Whiteford.
Hija rrakkuntat li baqgħet tgħinu, anke wara li rtirat, u li kienet temmen fih għax kien intelliġenti u kellu potenzjal. Madankollu, meta qrat l-aħbarijiet li fihom issemma’ bħala l-akkużat f’każ ta’ frodi kontra mara anzjana, marret għand avukat u għamlet rapport lill-Pulizija.
Hija tatu l-flus f’diversi pagamenti u qalilha li se jbigħ il-karozza biex iħallasha lura. Wara xi żmien, indunat li setgħet tinsa l-flus għal kollox. F’Ġunju rċeviet €2,000 fuq Revolut u mbagħad aktar tard €35,000, li qalilha li bagħtilha biex iżżommhom siguri peress li kien ġie tradut minn mara oħra. Hija qalet li minn dawn il-flus żammet €10,000 bħala parti mid-dejn, u rritornatlu l-bqija.
Scicluna kkonfermat li qatt ma sar kuntratt għall-flus li tatu, u wara l-konfront mal-Pulizija, qatgħet kull kuntatt miegħu. Madankollu, huwa pprova jerġa’ jikkuntattjaha permezz ta’ nies oħra, fosthom psikologu u uffiċjal tal-ħabs li bagħtulha emails.
Il-Qorti semgħet ukoll lix-xhud Maria Mifsud Bonnici, nutara, li kkonfermat li l-allegata vittma ffirmat att ta’ donazzjoni ta’ €100,000 lil Whiteford b’mod volontarju u wara li ġie spjegat li ma setgħetx titlob lura l-flus.
Meta ġiet mistoqsija mill-Avukat Charles Mercieca waqt il-kontro-eżami, Victoria Scicluna qalet li Gialanze Whiteford kellu tfulija diffiċli u diżfunzjonali u kien jidher fl-inħawi taċ-Ċentru tad-Detox sa minn meta kellu disa’ snin. Saħqet li kien l-ewwel żagħżugħ li ġie ammess fi programm ta’ riabilitazzjoni mid-droga fl-età ta’ 13-il sena.
Wara Scicluna, telgħet fuq il-pedana tax-xhieda n-Nutar Maria Mifsud Bonnici, li spjegat id-dettalji tal-att ta’ donazzjoni fejn l-allegata vittma tat €100,000 lil Whiteford. In-nutar qalet li kienet spjegat b’mod ċar lill-vittma li ladarba l-flus jingħataw b’donazzjoni, ma setgħetx titlobhom lura. Hija enfasizzat li fil-mument tal-firma tal-att ma kien hemm xejn suspettuż u li r-relazzjoni bejn it-tnejn kienet waħda rilassata tant li kienu saħansitra qed jiċċajtaw bejniethom.
Il-Prosekuzzjoni tmexxiet mill-Avukati Yvette Borg Cardona u Martina Muscat, bl-assistenza tal-Ispettur tal-Pulizija Ylenia Scerri. L-Avukati Charles Mercieca u Ishmael Psaila dehru għal Gialanze Whiteford. L-Avukati Franco Debono u Anthea Bonnici Zammit dehru għall-allegata vittma. Whiteford u l-ko-akkużat Andre Frendo qed jiġu akkużati bi frodi u approprjazzjoni indebita.
