Hekk kif bħalissa għadejjin il-Kampjonati Balkani tal-European Athletics, fil-Pantessalaiko Stadium fil-Greċja l-Maltin ikomplu jimpressjonaw u jagħmlu unur kbir lill-pajjiżna.
Riżultat mill-aqwa fit-800 metru minn Gina McNamara li temmet fir-raba’ post f’2 minuti 2.85 sekondi. Fl-ewwel post temmet Dilek Kocak tat-Turkija f’2 minuti 1.73 sekondi qabel Georgia Maria Despollari tal-Greċja f’ 2 minuti 2.53 sekondi filwaqt li fit-tielet post qabel Gina McNamara temmet is-Slovena Nina Vukovic f’2 minuti 2.53 sekondi.
B’2 minuti 2.85 sekondi Gina McNamara tejjbet b’mod sostanzjali fuq l-aħjar ħin tagħha li kien ta’ 2 minuti 3.13 sekondi. Fl-istess Kampjonati Balkani, fil-finali tal-5000 metru mirbuħa minn Elzan Bikic tas-Serbija f’14 il-minuta 3.83 sekondi , Dillon Cassar temm fis- 7 post f’14 il-minuta 41.05 sekondi filwaqt li Simon Spiteri temm fit-8 post f’ 14 il-minuta 50.83 sekondi.
Fil-Logħob tal-FISU – Federazzjoni Internazzjonali tal-Isport tal-Universitajiet, f’Bochum fil-Ġermanja, għall-ewwel darba fl-istorja tal-atletika, Rachela Pace fit-triple jump wara li qabżet 13.25 metri biex temmet fit-tmien post, għaddiet għal finali. B’qabża ta’ 12.91 metri fil-finali , Rachela Pace temmet fil-11 il-post.
