Joe Zahra ta’ 34 sena minn San Ġiljan intbagħat 33 xahar ħabs wara li nstab ħati li kkawża feriti gravi fuq żagħżugħ waqt argument li seħħ fid-dar fejn kien jgħix il-vittma, fi Triq Tumas Galea, Birkirkara.
Il-każ seħħ bejn id-9:30am u 10am fis-10 ta’ Ottubru 2018, meta Zahra u Timothy Mangion kienu bi flixkun vodka. Fid-dar, il-vittma rrakkonta kif Zahra fetaħ pakkett li kien fih droga magħrufa bħala “coke tal-pipa”, beda jpejjep, u ftit wara ntilef minn sensih.
Mangion poġġieh f’recovery position iżda ma ċempilx għall-għajnuna medika għax ħaseb li Zahra kien se jfiq waħdu. Wara li Zahra ġie f’tiegħu xi kwarta wara, sar aggressiv ħafna – beda jgħajjat “pulizija” u qabeż fil-bitħa ta’ ġar. Hu mbagħad qabeż fuqu, tah diversi daqqiet bil-ponn, kissirlu oġġetti, u attakkah b’kontenitur tal-ħġieġ.
Kompla jagħmel ħsara fil-kċina, sab imqass, u allegatament tah bih f’saqajh u f’idejh. Il-vittma qal li tant kien dgħajjef li ma setax jiftaħ il-bieb biex Zahra joħroġ.
L-ispettur Christina Delia spjegat li l-Pulizija tar-Rapid Intervention Unit (RIU) kellhom jiżgassaw il-bieb tad-dar biex jidħlu, fejn sabu lil Zahra b’sikkina f’idu u sparawlu taser biex jikkontrollawh. Sparaw ukoll żewġ tiri ta’ twissija. Joe Zahra huwa persuna magħrufa sew mal-Pulizija. It-testimonjanza dettaljata ta’ Timothy Mangion fil-Qorti tipprovdi rakkont estensiv u disturbanti ta’ dak li ġara dakinhar.
Meta ġie mistoqsi taħt kontra-eżami, Mangion ċaħad li kien hu li kellu d-droga, li ħeġġeġ lil Zahra biex jieħduha fid-dar, u ċaħad ukoll li kien seraqlu flus jew sakkarlu l-bieb. Imbagħad kompla jirrakkonta l-aggressjoni vjolenti li ġarrab:
“…meta beda jiġi naqra f’tiegħu, ġie fuqi u tgħidx kemm tani bil-ponn, kellu saħħa enormi. Kisser bowl kanella, u beda jtini hawnhekk fuq rasi…” Il-Qorti staqsiet dwar in-natura tal-bowl, u Mangion qal li kienet tal-ħġieġ, u li kienet tużaha ommu.
Mangion deher kredibbli u dettaljat fl-ispjegazzjoni tiegħu, li kompliet tikkonferma r-rapporti inizjali tal-Pulizija li sabu lil Zahra f’ġirja bejn proprjetajiet, u lil Mangion ferut serjament u fi stat ta’ trawma. Fid-dawl tal-konsiderazzjonijiet magħmulha, dmir din il-Qorti hu ċar, qalet il-Maġistrat Donatella Frendo Dimech.
Il-Qorti hi obbligata tqis l-impatt li reati ta’ vjolenza gratwita jħallu fuq il-membri tas-soċjetà. Għal dawn ir-raġunijiet il-Qorti tqis li minkejja ċ-ċirkostanzi tal-każ, kien Zahra li għażel jabbuża mid-droga u għalhekk għandu jiffaċċja l-konsegwenzi ta’ għemilu. Vjolenza gratwita ma tista’ qatt tiġi tollerata.
Meta din iseħħ fl-erba’ ħitan ta’ daru, il-post li għandu jitqies bħala l-iktar sikur fejn il-bniedem isib il-kenn u l-protezzjoni. Ghal dawn il-motivi tikkundannah għal 33 xahar priġunerija. Il-Qorti ordnat li dan il-perjodu ta’ priġunerija għandu jitnaqqas miż-żmien li Zahra diġà qatta’ taħt arrest preventiv.
Inoltrè qed toħroġ Ordni ta’ Trażżin fil-konfront tal-imputat a favur ta’ Timothy Mangion għal żmien tliet
snin. Ordnat ukoll lill-imputat iħallas l-ammont ta’ €5,654.63ċ rappreżentanti tal-spejjeż peritali.
