Il-Malta Table Football Sports Association (MTFSA) ħabbret li Malta se tkun il-pajjiż ospitanti għall-Kampjonat Ewropew tal-Table Football tal-2025. Dan l-avveniment prestiġjuż se jara 14-il tim nazzjonali mill-aqwa fl-Ewropa jieħdu sehem flimkien f’pajjiżna f’tournament uniku f’nofs il-Mediterran li se jġib flimkien l-ogħla livell ta’ talent u spirtu sportiv.
Dan il-Kampjonat se jlaqqa’ l-aħjar plejers tal-Ewropa għall-kompetizzjoni kbira, b’wirjiet spettakolari u atmosfera ta’ festa. L-MTFSA qed tħejji biex tiżgura esperjenza eċċellenti għal kull min jattendi u qed taħdem kemm mal-partners kif ukoll mal-isponsors sabiex toffri faċilitajiet tal-ogħla klassi u ospitalità għal kull parteċipant u spettatur.
Il-President tal-MTFSA, John Zammit, qal: “Għandna sodisfazzjon kbir nilqgħu l-atleti ewlenin tat-table football Ewropew f’pajjiżna. Dan il-kampjonat mhux biss jippromwovi l-isport f’Malta imma jagħti wkoll opportunità unika lill-komunità u l-partitarji tagħna biex jesperjenzaw l-aqwa ta’ Table Football internazzjonali.”
