minn Victor Camilleri
Eks Editur ta’ In-Nazzjon
u Il-Mument
Jo Etienne Abela, il-Ministru tas-Saħħa, għadu ma jridx idaħħalha ġo moħħu li hu midjun mal-poplu Malti. Għadu ma jistax jifhem li għandu obbligu sagrosant li jispjega x’ġara eżatt biex wara 11-il sena sħaħ ta’ wegħdiet, ftaħir, u hype dwar sptar mentali ġdid għal pajjiżna, f’tebqa t’għajn, mal-bidla ta’ ministru, jintrema kollox mit-tieqa għal barra u tinbeda triq għalkollox differenti… u dan kollu bi spiża enormi fuq dahar it-taxpayer Malti.
Dan l-aħħar, il-Ministru Abela għamel kumment fil-paġna tiegħu ta’ Facebook bħala tweġiba għal konferenza tal-aħbarijiet minn tliet deputati tal-PN – Ian Vassallo, Graziella Galea u Albert Buttigieg – li azzardaw jikkummentaw dwar id-deċiżjoni tiegħu li joqtol it-tama ta’ sptar ġdid mentali li kienet nibtet sa mill-ewwel xhur tal-Gvern Laburista fl-2013.
Il-kurjuża hi kif Chris Fearne, l-Eks Ministru tas-Saħħa, jisma’ u jara dan kollu jseħħ quddiem għajnejh u jibqa’ b’fommu magħluq. Hu għandu responsabbiltà kbira, ewlenija, li jgħid il-verżjoni tiegħu… anzi għandu jkun hu li jwieġeb il-mistoqsijiet tal-Ministru li ġie warajh u rema dak kollu li kien xettel.
Kienu Fearne u sħabu li webblu lill-poplu b’dan l-isptar, li fuqu nefqu muntanja ta’ ewro fit-tħejjija tiegħu li, saħansitra kienet waslet sal-punt fejn Chris Fearne għarraf lill-Parlament bid-dettalji ta’ fejn u kif kellu jinbena dan l-isptar biswit Mater Dei. U dan kien biss f’Ottubru 2023.
Il-Ministru Abela għad irid jagħti verżjoni kredibbli kif sas-7 ta’ Jannar 2024 pajjiżna kellu kollox f’postu biex wara ħafna ‘pantomimi sa fl-aħħar ikollu sptar mentali ġdid, u mit-8 ta’ Jannar 2024 – meta hu nħatar Ministru tas-Saħħa – dak ix-xogħol kollu ntrema ħesrem.
Fil-mixja kollha ħotob lejn dan l-isptar mentali ‘ġdid’ kien hemm involuti biex iwiegħdu, ifaħħru, jappoġġjaw u jirrakkomandawh, ħemel ta’ politiċi, uffiċjali tal-Gvern, konsulenti u, fuq kollox, il-Partit Laburista.
Dawn in-nies kienu jinkludu:
■ Żewġ Prim Ministri: Joseph Muscat u Robert Abela
■ Tliet Ministri tas-Saħħa: Godfrey Farrugia, Konrad Mizzi u Chris Fearne
■ Żewġ Ministri tal-Finanzi: Edward Scicluna u Clyde Caruana
■ Is-CEO tal-Fondazzjoni Servizzi Mediċi: Carmen Ciantar (dik li minħabba l-kompetenza tagħha kienet titħallas €163,000 fis-sena)
■ Iċ-Chairman tad-Dipartiment tal-Psikjatrija fil-Ministeru tas-Saħħa: Il-Prof. Anton Grech
■ Il-Kummissarju tas-Saħħa Mentali: It-Tabib Dennis Vella Baldacchino
■ L-awturi tal-Mental Health Strategy for Malta (2020-2030)
■ Il-Partit Laburista: F’żewġ Manifesti Elettorali (2017 u 2022) kien dikjarat, bl-iswed fuq l-abjad, li se jibnu sptar mentali ġdid.
Fl-Estimi għall-2024, il-Gvern Laburisa kien ippreveda li jonfoq €3.6 miljun matul dik is-sena għal dan l-isptar waqt li n-nefqa għas-sena ta’ qabel kienet stmata €1.2 miljun.
Kif jista’ jkun isir infiq bħal dan, jinbidel il-Ministru, u jitwaqqaf kollox mingħajr spjegazzjoni kredibbli? Din hi l-akbar mistoqsija li xi ħadd fil-Gvern jew fil-Labour obbligat iwieġeb mingħajr tidwir mal-lewża.
Joseph Muscat
Robert Abela
Godfrey Farrugia
Konrad Mizzi
Chris Fearne
Carmen Ciantar
Edward Scicluna
Clyde Caruana
Anton Grech
Dr Vella Baldacchino
Mistoqsijiet lill-Ministru Abela
1. Meta ttieħdet id-deċiżjoni li l-Isptar Mentali l-ġdid ma jsirx kien konsultat – jew għall-inqas infurmat – l-Eks Ministru Chris Fearne, per kortesija u għall-korrettezza politika, u x’kienu r-reazzjonijiet ta’ Fearne wara li hu kien imbotta b’ruħu u b’ġismu dan il-proġett għal snin twal?
2. Tista’ ssemmielna l-‘esperti’ lokali li int tgħid li tawkom parir biex twaqqfu l-proġett imwiegħed tal-Isptar Mentali ġdid? L-esperti lokali l-oħrajn, dawk li matul is-snin ħadmu u ħeġġew lill-Gvern jibni sptar mentali ġdid, qablu li dak kollu li kienu għamlu jintrema ’l barra?
3. Kemm ġie jiswa x-xogħol kollu li kien sar biex ikun ippjanat sptar mentali ġdid matul is-snin li Gvern Laburista kien wiegħed u juża għall-ftaħir politiku tiegħu, b’mod speċjali lejlet xi elezzjoni? Lest iqiegħed kollox quddiem l-Awditur Ġenerali biex isir l-iskrutinju dovut?
4. Tħoss li għandek titlob apoloġija lill-poplu Malti wara li mortu lura minn wegħda ċara u preċiża fl-aħħar żewġ Manifesti Elettorali Laburisti – tal-2017 u tal-2022 – jew għall-inqas tiskuża ruħek ma’ dawk li vvutawlkom f’dawn l-aħħar żewġ elezzjonijiet ġenerali?
Dan l-artiklu deher f’In-Nazzjon tal-Ħamis 31 ta’ Lulju, 2025.
