Kmieni l-Ħadd filgħodu, attakk b’missili Russi qered djar u infrastruttura ċivili fil-belt tan-Nofsinhar tal-Ukrajna, Mykolaiv, skont uffiċjali lokali.
Mill-inqas tliet ċivili ġew irrappurtati midruba fil-belt qrib il-Baħar l-Iswed, li kienet fil-mira ripetuta tal-forzi Russi.
Kmieni l-Ħadd, nirien qawwija qabdu wkoll f’maħżen taż-żejt viċin il-belt ta’ Sochi fil-Baħar l-Iswed fir-Russja – attakk li l-awtoritajiet Russi akkużaw li kien operazzjoni bil-drones mill-Ukrajna. L-ajruport ta’ Sochi, li jinsab fl-istess żona – fid-distrett ta’ Adler – sospena l-vjaġġi bl-ajru. Il-Gvernatur tar-Reġjun ta’ Krasnodar qal fuq Telegram li fdalijiet ta’ drone laqtu tank tal-fuel, u 127 pumpier għenu biex jikkontrollaw in-nar.
L-attakk bil-drone kien wieħed minn diversi li ġew imnedija mill-Ukrajna matul tmiem il-ġimgħa, fil-mira tagħhom kienu installazzjonijiet fil-bliet tan-Nofsinhar tar-Russja – Ryazan, Penza u Voronezh, bil-gvernatur ta’ Voronezh jgħid li erba’ persuni ndarbu f’attakk wieħed.
Il-President Ukren Volodymyr Zelensky appella għal sanzjonijiet internazzjonali aktar b’saħħithom fuq ir-Russja din il-ġimgħa, wara attakk qattiel fuq Kyiv nhar il-Ħamis li ħalla mill-inqas 31 persuna mejta. Skont uffiċjali Ukreni, aktar minn 300 drone u tmien missili ġew imnedija fl-attakk – wieħed mill-aktar fatali fuq il-kapitali minn meta r-Russja bdiet l-invażjoni fuq skala sħiħa f’Frar tal-2022.
