Albert Buttigieg, PN
Id-Deputat Nazzjonalista Albert Buttigieg qal fil-parlament li Il-gvern qed jinħeba wara każi ġenwini dwar nuqas ta’ ħlas tat-taxxa biex ipaxxi lil tal-qalba.
Hu tkellem dwar il-moralitá fiskali u qal li matul is-snin, pajjiżna għamel passi ‘l quddiem biex jiġbor dak li huwa dovut lil Cesare Imma xorta hemm min iħossu speċjali li ma jagħmilx dan; dawn mhumiex ftit.
Jirriżulta li hemm ‘l fuq minn €1 biljun ta’ ħlasijiet imma wkoll €4.8 biljuni ta’ VAT mhumiex imħallsa. Il-ministru responabbli stqarr ukoll li 60% ta’ dawn l-ammonti huma dovuti minn numru ta’ negozjanti aktar milli ta’ ċittadini komuni.
Għalkemm huwa tajjeb li nagħmlu dan għaliex tajjeb li nagħtu l-appoġġ li min huwa fin-negozju immafl-istess waqt rridu noqgħodu attenti li ma nwasslux il-messaġġ żbaljat liċ-ċittadini li wieħed jista’ ma jħallas taxxa jew li l-ħlas taxxa huwa donnha optional, jiġifieri wieħed jista’ jaqa’ lura għaliex jaf li hemm min jaħfirlu.
Hu qal li trid issir distinzjoni bejn każijiet ġenwini u dawk li mhumiex. Imma jekk verament irridu ngħinu lil min huwa ġenwien, kien ikun aħjar li kieku s-sistema ta’ repayments titwal aktar.
B’hekk il-messaġġ jibqa’ xorta li l-evazjoni tax-taxxa mhuwiex aċċettabli filwaqt hemm appoġġ lil min huwa ġenwien.
Imma donnu l-Gvern b’dan l-abbozz qiegħed juża stejjer ġenwieni imma warajhom hemm oħrajn li mhumiex. Hekk ġara fil-kaz ta’ serq tad-dawl mill-meters. fejn il-gvern ħareġ skemi biex jaħfirlhom filwaqt li kull ċittadin irid iħallas kull kont tad-dawl. Hekk ġara fil-każ ta’ serq tal-benfiċċji soċjali u fil-każ ta’ min kellu tigri u ljuni u annimali esotiċi oħra.
Hekk bi ħsiebu jagħmel bl-abbozz fuq l-iżvilupp u l-ippjannar fejn qed jipproponi li min bena b’mod illegali bħal bnew binjiet sħaħ illegali, il-Gvern irid jagħtihom maħfra. Il-Gvern qed jsaħħaħ il-mentalità u l-kultura li kollox jgħodd u kollox igħaddi.
Iċ-ċittadin onest quddiem iħoss li donnu mhux valutat li wieħed iħallas fil-ħin u dak li huwa dovut lilu.
Albert Buttigieg qal li filwaqt li tajjeb li l-Gvern qiegħed jipprova jsaħħaħ l-infurzar fil-ġlieda kontra l-evazjoni tat-taxxa imma jekk verament irid jagħmel dan huwa għandu jagħmel distinzjoni bejn każi ġenwieni u dawk li mhumiex.
Dawk li huma ġenwini għandom jingħataw l-għajnuna u termini aħjar ta’ ħlasijiet filwaqt li dawk li qegħdin evadu b’mod sistematiku t-taxxa, il-Gvern juri fermezza u dixxiplina.
Il-gvern ma jistax ikun ‘strong with the weak and weak with the strong’. B’dan l-abbozz, il-Gvern qiegħed jipprempja lil min naqas minn dmiru b’mod sfaċċat, fejn saħansitra persuni li tressqu l-Qorti għandhom iċ-ċans li jixtru l-‘innoċenza’ tagħhom u jwaqqgħu l-kaz tagħhom jekk huma jħallsu penali.
Il-Gvern għandu jieqaf jinħeba wara każjiet ġenwini biex jpaxxi lil tal-qalba u kulħadd jaf min huma tal-qalba, sostna d-deputat Nazzjonalista Albert Buttigieg.
