Raġel ta’ 24 sena mixli li ta daqqiet lis-sieħba tqila tiegħu nqabad f’sitwazzjoni li ntemmet b’dikjarazzjoni sorprendenti mill-vittma stess fil-Qorti: li riedet tirtira l-akkużi kontrih. Milan Janjetovic, imwieled fil-Bosnia Herzegovina u residenti San Pawl il-Baħar, tressaq il-Qorti mixli li kkaġuna ġrieħi ħfief lis-sieħba tiegħu ta’ nazzjonalità Serba.
Huwa wieġeb li mhux ħati għall-akkużi. Meta ġie mistoqsi huwa qal li jaħdem fil-qasam tal-kostruzzjoni. Il-vittma, li kienet preżenti fil-Qorti, iddikjarat li għandha sitt xhur tqala u qalet li xtaqet tirtira l-akkużi. Spjegat li ma għandhiex intenzjoni li tkompli r-relazzjoni mal-akkużat, iżda xorta tittama li “ħadet id-deċiżjoni t-tajba fuq dan il-każ” u li se jkun missier eżemplari.
Madankollu, ammettiet li dan ma kienx l-ewwel inċident, u rrakkuntat li darba minnhom kien taha daqqiet ta’ ħarta u anke ħebb għaliha. Il-Qorti, preseduta mill-Maġistrat Lara Lanfranco, wissiet lill-mara li jekk tirtira l-akkużi, ma tkunx tista’ tagħmel referenza għal dan il-każ fil-futur.
Il-mara qalet li kienet konxja ta’ dan u li dan kien l-ewwel każ serju bejnha u Janjetovic. Żiedet tgħid li kienet taf li l-qrati mhux se jipprovdulha protezzjoni jekk l-akkużi jiġu rtirati, u xorta aċċettat dawn iċ-ċirkustanzi.
Il-Qorti laqgħet it-talba biex jiġu rtirati l-akkużi, filwaqt li ħadet inkunsiderazzjoni wkoll l-aħjar interessi tat-tarbija li għadha trid titwieled. Fl-aħħarnett, il-Maġistrat Lanfranco indirizzat lil Janjetovic b’twissija ċara: “jekk jerġa’ jinqala’ każ simili, speċjalment jekk ikun jinvolvi l-istess vittma, il-Qorti mhux se taċċetta li l-akkużi jiġu rtirati.”
Qaltlu li għandu jkun grat li se jsir missier u ħeġġitu biex jieħu dan il-mument bħala opportunità biex ibiddel l-imġiba tiegħu, inkella jispiċċa fl-inkwiet. Raġuni li l-każ twaqqa’ kien ukoll li l-koppja mhux se tibqa’ tgħix flimkien, peress li t-tnejn li huma qegħdin jabitaw f’residenza separata.
Il-prosekuzzjoni tmexxiet mill-Ispettur Colin Sheldon.
