Il-Prim Ministru Iżraeljan Benjamin Netanyahu irid li l-Iżrael jokkupa kompletament Gaza meta jiltaqa’ mal-kabinett tas-sigurtà tiegħu.
Hekk qed jiġi rrapportat mill-midja Iżraeljana, bil-familji tal-ostaġġi Iżraeljani, inevitabbilment, qed jibżgħu li pjanijiet bħal dawn jistgħu ipoġġu fil-periklu lil qrabathom, b’20 minn 50 ostaġġ maħsuba li għadhom ħajjin f’Gaza, filwaqt li stħarriġ juri li tlieta minn kull erba’ Iżraeljani jippreferu ftehim ta’ waqfien mill-ġlied biex dawn jinġiebu lura.
Ħafna mill-alleati qrib ta’ Iżrael huma wkoll mistennija jikkundannaw pass bħal dan, hekk kif qed iħeġġu l-Gvern biex itemm il-gwerra u jieħdu miżuri biex tiġi indirizzata l-kriżi umanitarja.
F’Iżrael stess, mijiet ta’ uffiċjali tas-sigurtà li rtiraw, inkluż eks kapijiet ta’ aġenziji tal-intelliġenza, ippubblikaw ittra konġunta indirizzata lill-President Amerikan Donald Trump it-Tnejn, biex iħeġġuħ jagħmel pressjoni fuq Netanyahu biex itemm il-gwerra.
L-aħħar żviluppi seħħew wara li tkissru taħditiet indiretti ma’ Hamas dwar waqfien mill-ġlied u ftehim dwar l-ostaġġi, u wara li gruppi armati Palestinjani ħarġu tliet filmati ta’ żewġ ostaġġi Iżraeljani.
L-armata Iżraeljana tgħid li diġà għandha kontroll operattiv fuq 75% ta’ Gaza. Iżda taħt il-pjan propost, Iżrael jokkupa t-territorju kollu – inkluż żoni fejn bħalissa jinsabu kkonċentrati aktar minn żewġ miljun Palestinjan.
Għad ma kien hemm l-ebda reazzjoni formali, iżda uffiċjali mill-Awtorità Palestinjana, li tmexxi partijiet mill-West Bank okkupat, ikkundannaw il-proposta Iżraeljana, u sejħu lill-komunità internazzjonali biex tintervjeni sabiex tevita okkupazzjoni militari ġdida.
