Godstine Idogin, raġel ta’ 37 sena min-Niġerja, ingħata sentenza ta’ ħames snin priġunerija u multa ta’ €15,000 wara li ammetta li fil-31 ta’ Marzu tal-2022, importa u kellu l-intenzjoni li jitraffika il-kokaina f’Malta. Il-każ tiegħu tressaq quddiem il-Qorti Kriminali wara li ammetta l-akkużi taħt Artikolu 392B tal-Kodiċi Kriminali, li jippermetti li l-ġuri ma jsirx jekk l-imputat jammetti l-ħtija fil-Qorti tal-Maġistrati.
L-Imħallef Consuelo Scerri Herrera laqgħet il-piena proposta konġuntament mill-Avukat Ġenerali u d-difiża, u ddikjarat li sentenza ta’ ħames snin ħabs flimkien ma’ multa ta’ €15,000 kienet proporzjonata fid-dawl taċ-ċirkostanzi.
L-espert tal-Qorti Gilbert Mercieca kkonkluda li s-sustanza kienet taħlita ta’ kokaina u “phenacetin” li kienet tiżen total ta’ madwar 397 gramma, bil-valur estimu tagħha jkun dak ta’ €25,430. Il-persentaġġ ta’ purità tal-kokaina kien ta’ 48%.
Barra mill-piena, il-Qorti ordnat il-konfiskazzjoni tal-proprjetà kollha relatata mar-reat, inkluż kwalunkwe oġġett jew droga involuta fil-każ, u ddeċidiet li dawn għandhom jiġu distrutti sakemm l-Avukat Ġenerali ma jagħtix direttivi oħra fi żmien 15-il ġurnata.
Idogin ġie wkoll ordnat iħallas €3,460.39 fi spejjeż relatati ma’ diversi esperti appuntati mill-Qorti, fosthom esperti forensiċi u analisti tekniċi li kienu involuti fil-proċess investigattiv. Il-Qorti avżat li jekk il-multa ma titħallasx fi żmien ġimgħa mis-sentenza, din tiġi konvertita f’sena ħabs addizzjonali.
Is-sentenza tirrifletti s-serjetà li biha l-Qrati Maltin jitrattaw każijiet ta’ traffikar ta’ droga, anke meta jkun hemm ammissjoni u koperazzjoni mill-imputat.
Il-prosekuzzjoni tmexxiet mill-Avukati Ġenerali Kevin Valletta u Maria Francesca Spiteri.
