Sid ta’ gym minn Marsaskala ta’ 30 sena, Ruud Buhagiar, inżamm taħt arrest wara li wieġeb mhux ħati għal akkużi serji fosthom tixħim ta’ uffiċjal tal-pulizija, involviment f’organizzazzjoni kriminali, u traffikar ta’ droga.
Buhagiar tressaq il-Qorti l-Ħamis fejn ġie akkużat li kkorrompa Surġent tal-pulizija bil-għan li jikseb informazzjoni sensittiva dwar operazzjonijiet investigattivi li kienu għaddejjin. Il-prosekuzzjoni allegat li permezz tal-għemil tiegħu, l-akkużat kiser l-integrità tal-Korp tal-Pulizija u ffaċilita attività kriminali.
Il-każ beda f’Ottubru meta l-Pulizija kienu qed jinvestigaw serqa ppjanata li iżda qatt ma seħħet. Suspett immedjat waqa’ fuq Buhagiar, li kien wieħed mill-persuni magħrufa mal-investigaturi. Matul l-istħarriġ, il-Pulizija skoprew li membru tal-korp kien qed jgħaddi dettalji operattivi lil terzi, inkluż lil Buhagiar.
Il-każ laħaq punt kruċjali fid-18 ta’ Novembru meta ġiet arrestata s-Surġent Cherise Camilleri, wara li ġie eżegwit mandat ta’ tfittxija u arrest. Informazzjoni misjuba fil-mobile tagħha allegatament uriet li kienet qed tgħaddi informazzjoni sigrieta lill-akkużat.
Tlett ijiem wara, Buhagiar ġie arrestat fl-Ajruport Internazzjonali ta’ Malta hekk kif kien qed jirritorna minn btala barra minn Malta. Madanakollu, minħabba kundizzjoni medika, hu ttieħed Mater Dei għall-kura u aktar tard ġie rilaxxat taħt police bail.
Investigazzjonijiet ulterjuri żvelaw li fil-mobile ta’ Buhagiar instabet informazzjoni dwar diversi operazzjonijiet tal-Pulizija, fosthom irjieħ kontra t-traffikar tad-droga. Hu ġie mressaq il-Qorti fejn tressqu kontrih akkużi ta’ tixħim, promozzjoni ta’ organizzazzjoni kriminali, kompliċità fit-traffikar ta’ droga, kif ukoll pussess ta’ kannabis f’ċirkostanzi li jindikaw li mhux għall-użu personali biss.
Fost l-akkużi oħra, huwa ġie mixli wkoll b’użu ħażin ta’ tagħmir ta’ komunikazzjoni elettronika u reċidiva, jiġifieri li wettaq reati oħra fil-passat.
Il-prosekuzzjoni mmexxija mill-Ispetturi Christina Delia u Lydon Zammit, flimkien mal-Avukati mill-Uffiċċju tal-Avukat Ġenerali Kevin Valletta u Maria Francesca Spiteri, talbet sabiex jinħareġ ordni ta’ ffriżar tal-assi tal-akkużat – talba li ġiet milqugħa mill-Qorti.
L-avukati tad-difiża, Alfred Abela u René Darmanin, talbu għall-ħelsien mill-arrest, billi sostnew li l-evidenza prinċipali hija diġà f’idejn il-Pulizija u ppreżervata. Huma żiedu li l-kopertura medjatika estensiva tal-każ kienet tfisser li potenzjali kompliċi diġà ġew allertati u l-investigazzjonijiet jistgħu jkomplu mingħajr ma Buhagiar jinżamm arrestat.
Madankollu, l-Ispettur Zammit oġġezzjona bil-qawwa, billi ddeskriva l-akkużat bħala persuna li “kiser is-sistema kollha” u li mhux jista’ jsir minnu. Il-prosekuzzjoni enfasizzat ukoll li l-investigazzjonijiet għadhom għaddejjin u hemm għadd ta’ xhieda, inkluż ċivili, li għad iridu jixhdu.
Wara li semgħet l-argumenti miż-żewġ naħat, il-Maġistrat Abigail Critien ċaħdet it-talba għall-ħelsien mill-arrest minħabba l-gravità tal-akkużi u r-riskju li l-investigazzjoni tiġi mfixkla.
Il-każ se jkompli fil-ġimgħat li ġejjin hekk kif l-investigazzjonijiet jissoktaw.
