Il-mara li kienet involuta f’inċident li ħalla sewwieq ta’ mutur fil-periklu tal-mewt nhar il-Ħadd li għadda, kellha sitt darbiet iżjed mil-limitu legali tal-alkoħol fil-ħin tal-inċident.
Yoana Valentinova Gatt, Bulgara ta’ 44 sena residenti San Pawl il-Baħar, tressqet il-Qorti nhar it-Tnejn akkużata b’rabta mal-ħabta f’Baħar iċ-Ċagħaq.
Gatt laqtet il-mutur minn wara u weġġgħet serjament lis-sewwieq, li hu Belġjan ta’ 53 sena residenti l-Gżira.
L-akkużata ġiet mixlija li kkawżat ġrieħi serji b’negliġenza, sewqan perikoluż, ħsara fuq il-mutur tal-vittma, sewqan taħt l-influwenza tax-xorb u sewqan fis-sakra.
Il-mara sarilha test tal-breathalyzer u rriżulta li kienet sitt darbiet iktar mil-limitu legali. Hi ġiet arrestata u interrogata. L-ispettur semma’ kif hi kienet diġà tilfet il-liċenzja tas-sewqan fil-pajjiż tagħha l-Bulgarija wara li falliet test tal-breathalyzer fl-2014 – iżda li l-liċenzja attwali tagħha hija valida.
Il-mara ċaħdet l-akkużi u l-avukat tagħha ta’ għajnuna legali talbet il-ħelsien mill-arrest minħabba li għandha tifla żgħira; u tirriskja titlef xogħolha jekk ma tingħatax il-ħelsien mill-arrest. Il-prosekuzzjoni oġġezzjonat, billi qalet li setgħet tfixkel l-evidenza u enfasizzat is-serjetà tal-każ.
Il-Qorti ċaħdet il-ħelsien mill-arrest, u qalet li t-talba kienet prematura fid-dawl tas-serjetà tal-każ.
