OPINJONI: Mhux b’xi miraklu iżda b’numru ta’ miżuri li flimkien għamlu d-differenza

minn Victor Camilleri
Eks Edtur ta’
In-Nazzjon u ll-Mument

Is-suċċess miksub mill-awtoritajiet ta’ Helsinki fit-trażżin ta’ inċidenti fit-toroq ta’ din il-belt kapitali Finlandiża, ma kienx frott ta’ xi miraklu iżda bħala riżultat ta’ numru ta’ miżuri li ttieħdu fl-aħħar snin u li, kollha flimkien, ipprovdew qafas ta’ protezzjoni adegwata fil-konfront tas-sewwieqa li għamlu użu minn dawn it-toroq.

Skont l-aħħar ċifri uffiċjali, l-aħħar mewta reġistrata bħala riżultat ta’ inċident tat-traffiku seħħet f’Lulju tas-sena l-oħra. Fl-2021, Helsinki naqqset il-limitu ta’ veloċità fil-biċċa l-kbira tat-toroq tagħha għal 30 kilometru fis-siegħa. Dawn l-istess ċifri wrew li r-riskju ta’ fatalità jonqos b’50 fil-mija meta l-veloċità titnaqqas minn 40 għal 30 kilometru fis-siegħa.

Fl-istess żmien, il-belt introduċiet 70 speed camera ġodda, skont il-policy nazzjonali Finlandiża ta’ Vision Zero, maħsuba biex telimina l-imwiet u l-korrimenti li jirriżultaw minn inċidenti tat-traffiku. Minn meta ġiet fis-seħħ din il-policy kien osservat li l-fatalitajiet baqgħu jonqsu biex issa ntlaħaq dan it-tragward tant ambizzjuż.

Għalkemm Helsinki hi kunsidrata bħala waħda mill-iżgħar kapitali Ewropej – b’690,000 resident – din il-belt isservi madwar 1.5 miljun ruħ li jgħixu jew jaħdmu f’dawk l-inħawi.

▪ Il-miżuri adottati f’Helsinki kienu jinkludu, fost l-oħrajn, it-tnaqqis tal-veloċità għal 30 kilometru fis-siegħa (18.6 mil fis-siegħa) fit-toroq qrib l-iskejjel kollha.

▪ Aktar minn nofs it-toroq kollha ta’ Helsinki għandhom il-limitu ta’ 30 kilometru fis-siegħa. Dawn l-istess toroq kellhom limitu ta’ 50 kilometru fis-siegħa (31 mil fis-siegħa) 50 sena ilu.

▪ Pass ieħor importanti kien it-tlestija ta’ infrastruttura adegwata għaċ-ċiklisti u għal min jimxi. Meded sħaħ tlestew f’dan ir-rigward fosthom 400 kilometru esklussivament għaċ-ċiklisti.

▪ L-awtoritajiet tal-belt kapitali Finlandiża irreklutaw numru sostanzjali ta’ pulizija ġodda assenjati esklussivament għat-toroq… prinċipali u mhux.

▪ F’ħafna nħawi ta’ Helsinki t-toroq djiequ u nżergħu ħafna siġar bl-iskop preċiż li jimmotivaw lis-sewwieqa jkunu aktar attenti, kawti, u ffukati.

▪ Helsinki għamel enfasi qawwija wkoll fuq is-sistema ta’ trasport pubbliku komdu, effiċjenti, frekwenti u puntwali. Dan wassal biex aktar nies bdew jużawh u naqsu, għalhekk, ħafna karozzi mit-toroq.

▪ L-istatistika turi wkoll li bejn l-2003 u l-2023, l-inċidenti fit-toroq li fihom kien hemm nies li weġġgħu, naqsu minn 727 għal 14 fis-sena.

Fil-pajjiżi tal-Unjoni Ewropea, il-fatalitajiet f’inċidenti tat-traffiku fl-2024 naqsu bi 3 fil-mija iżda l-Kummissjoni Ewropea għadha mhix sodisfatta u tridhom jonqsu kemm jista’ jkun. Hu ovvja, għaldaqstant, li l-Kummissjoni qed tistudja mill-qrib dak li seħħ f’Helsinki.

Roni Utriainen, inġinier tat-traffiku ewlieni għall-belt ta’ Helsinki, qal: “Hemm numru ta’ fatturi li wasslu għal dan ir-riżultat iżda t-tnaqqis fil-limitu tal-veloċità hu l-aktar importanti.

Triq f’Helsinki fejn numru ta’ miżuri effettivi li ttieħdu fl-aħħar snin wasslu biex ma kien hemm l-ebda mwiet fit-toroq fl-aħħar 12-il xahar

L-istatistika wriet li r-riskju ta’ fatalitajiet jonqos b’50% meta l-veloċità titnaqqas minn 40 għal 30 kilometru fis-siegħa

Fatalitajiet fit-toroq Maltin fl-aħħar 25 sena…

2000:               20

2001:               19

2002:               16

2003:               16

2004:               14

2005:               17

2006:               10

2007:               14

2008:               15

2009:               21

2010:               15

2011:               18

2012:               9

2013:               18

2014:               10

2015:               11

2016:               23

2017:               19

2018:               18

2019:               16

2020:               12

2021:               9

2022:               28

2023:               14

2024:               13

2025:               19 (s’issa)

Dan l-artiklu deher f’In-Nazzjon tat-Tnejn 18 ta’ Awwissu, 2025.