Raġel ta’ 40 sena miż-Żejtun wieġeb mhux ħati għall-akkużi li żamm lil ommu kontra r-rieda tagħha biex tagħtih il-flus għad-droga. Il-Qorti, preseduta mill-Maġistrat Yana Micallef Stafrace, semgħet kif l-akkużat, li hu bla xogħol u dipendenti fuq id-droga, ġie akkużat bi vjolenza psikoloġika kontra l-omm ta’ 74 sena.
Skont il-prosekuzzjoni huwa pprova jġegħelha tagħtih il-flus fejn akkużatu b’fastidju, insulti u theddid, kif ukoll b’akkużi ta’ vjolenza domestika. Il-Pulizija spjegat kif l-omm kienet irrapurtat lill-awtoritajiet nhar l-Erbgħa, 20 ta’ Awwissu.
Dakinhar, waqt li kienet fil-kamra tas-sodda tagħha, binha beda jinsisti biex tagħtih €30 wara li skont hu kien diġà ħallas parti minn “tiswija” għal sensor tal-arja kkundizzjonata, li fil-verità ma saritx. Meta rrifjutat, l-akkużat daħal fil-kamra tagħha, ħadilha l-mobili u għalaqha ġewwa. Il-Pulizija marru fuq il-post u arrestawh.
Intant, il-Qorti semgħet ukoll kif ir-raġel kellu ħames armi fuq ismu, iżda qabel il-każ kien biegħhom mingħajr ma informa lill-Pulizija kif titlob il-liġi. L-ispettur Christian Cauchi oġġezzjona għat-talba għall-ħelsien mill-arrest, li kienet saret mill-avukat tal-għajnuna legali Francois Dalli.
Huwa argumenta li l-indirizz alternattiv propost – kamra f’għalqa – ma kienx adattat u lanqas abitabbli. Barra minn hekk, l-omm tal-akkużat għadha ma xehditx u kien hemm biża’ reali li l-akkużat jerġa’ jikkommetti reat minħabba l-problema serja ta’ droga li għandu.
Il-Maġistrat Micallef Stafrace ċaħdet it-talba għall-ħelsien mill-arrest, ordnat li l-akkużat jinżamm taħt arrest preventiv u ħarġet ukoll ordni ta’ protezzjoni favur l-omm. Isem l-akkużat mhux jissemma’ biex tiġi protetta l-identità tal-omm.
