Wieħed mis-sidien ta’ diversi appartamenti ta’ Tania Flats f’Paceville, li spiċċaw għarbiel wara kollass katastrofiku f’Ġunju, fetaħ uffiċjalment kawża fil-Qorti kontra diversi żviluppaturi, kuntratturi u kumpaniji, biex jinżammu responsabbli għall-ħsarat li ġarrbu.
Il-kumpanija High Point Limited, sid ta’ tmien appartamenti fil-blokka, sostniet li l-konsegwenzi setgħu kienu ħafna agħar kieku ma kinetx ħadet azzjoni immedjata biex tevakwa l-kerrejja ftit jiem qabel il-kollass.
Fi protest ġudizzjarju ppreżentat fil-Prim’Awla tal-Qorti Ċivili, il-kumpanija qalet li l-inċident kien ikkawżat minn xogħlijiet ta’ demolizzjoni estensivi f’sit ġar approvat għall-iżvilupp ta’ lukanda ta’ 125 kamra. Il-proġett kien approvat mill-Awtorità tal-Ippjanar f’April 2024 u kien jinvolvi demolizzjoni ta’ binjiet eżistenti, skavar fil-fond u kostruzzjoni ta’ bini b’ħames sulari taħt l-art għall-parkeġġ.
High Point Limited spjegat kif fid-9 ta’ Ġunju, direttur ta’ proprjetà viċina wissiehom dwar “problemi strutturali serji”. L-għada saret evakwazzjoni sħiħa, li kienet kompluta sal-11 ta’ Ġunju filgħodu. Ftit sigħat wara, filgħaxija tal-istess jum, il-blokka ikkollasat flimkien ma’ bini ieħor tal-madwar.
Il-protest isemmi diversi entitajiet u individwi marbuta mal-proġett, fosthom Mark Agius, f’isem Excel Inv Ltd, Excel Investments Ltd, Excel Developers Ltd, Excel Property Trading Ltd, l-arkitett tal-proġett Glenn Zammit Cauchi, il-manager tas-sit Mark Agius, l-uffiċjal tekniku tas-sit Abel Cassar De Gabriele, u l-kuntrattur tad-demolizzjoni Manuel Buhagiar.
Il-kumpanija allegat negligenza fix-xogħlijiet ta’ demolizzjoni, billi l-method statement kien iddikjara li l-binjiet tal-madwar kienu “stabbli u f’qagħda tajba” u ma kellhomx bżonn appoġġ temporanju – valutazzjoni li issa qiegħda tiġi kkontestata wara l-kollass.
High Point Limited qalet li sofriet ħsarat kbar, inkluż it-telf totali tat-tmien appartamenti, spejjeż ta’ rikostruzzjoni u telf ta’ dħul minn kiri fit-tul. Il-kumpanija qed titlob kumpens sħiħ u qed iżżomm lill-iżviluppaturi u kuntratturi responsabbli permezz ta’ tort u negliġenza, filwaqt li talbitilhom javżaw lill-assiguraturi tagħhom.
L-Awtorità tal-Bini u l-Kostruzzjoni (BCA) kienet ħarġet ordni ta’ waqfien tax-xogħol fl-10 ta’ Ġunju, iżda High Point Limited qalet li qatt ma ġiet infurmata direttament dwar l-istatus tax-xogħlijiet, ħlief minn dak li kien jidher pubblikament.
Din il-kawża qed tqajjem mistoqsijiet dwar il-prattiki tad-demolizzjoni f’Malta, ir-rwol tal-awtoritajiet fil-monitoraġġ tal-proġetti u r-responsabbiltà ta’ żviluppaturi u kuntratturi fiz-zoni ta’ kostruzzjoni dejjem aktar densament popolati.
Il-protest ġie ffirmat mill-avukati Antoine Cremona u Jacques Farrugia, flimkien mal-prokuratur legali Lindsey Galea.
