Żagħżugħ ta’ 23 sena, li ismu ma jistax jixxandar skont ordni tal-Qorti, ingħata l-ħelsien mill-arrest wara li l-vittma xehdet fil-proċeduri quddiem il-Qorti. Hu qed jiġi mixli li kkaġuna ġrieħi gravi lill-mara wara li allegatament ta’ daqqa kbira, minkejja li kien hemm ordni ta’ trażżin fil-konfront tiegħu.
L-akkużat qed jiċħad ukoll li hedded, insulta u attakka lill-mara, kif ukoll li kiser ordni ta’ probation u dik ta’ trażżin. Fil-kumpilazzjoni tax-xhieda, intqal li fit-12 ta’ Awwissu, il-koppja ltaqgħet barra ħanut tas-sbuħija (‘beauty salon), u wara li beda argument, il-vjolenza allegata eskalat hekk kif marru minn bar għall-ieħor.
L-akkużat allegatament ħadha miegħu fid-dar tiegħu, fejn talabha tgħid gidba dwar il-ġrieħi li ġarrbet biex il-ġenituri tagħha u bintha ma jarawhomx. Il-vittma xehdet li l-problema bdiet fil-karozza meta l-akkużat ilmenta li weġġa’ f’inċident waqt li kien sejjer jiltaqa’ magħha, li dan ġara tort tagħha u akkużaha li ma kinitx qed tirrispettah minħabba li waslet tard.
Qalet li waqt il-vjaġġ, l-akkużat baqa’ jistaqsi fuq ma’ min kienet qed toħroġ meta kienu mifruda. Hija rrakkuntat li f’punt minnhom, il-karozza waqqaf il-karozza ħdejn il-ħanut Maypole fin-Naxxar, fejn l-akkużat allegatament qabadha minn għonqha.
Madankollu, reġa’ qabad isuq għax xi ħadd kien qed jarah. Il-persuna li osservat kollox imbagħad bagħat messaġġ anonimu fil-grupp Facebook Women for Women, joffri li jixhed dwar dak li ra. Il-vittma wkoll irrakkuntat episodji ta’ vjolenza f’diversi bars, fejn saħqet li darba fost l-oħrajn kellu jidħol bartender biex iwaqqaf lill-akkużat milli jkompli jagħtiha.
L-Ispettur tal-Pulizija Audrey Micallef qalet li rċevew sejħa ta’ emerġenza fuq 112 mingħand il-vittma, wara li qrabatha kienu rrappurtawha li hija nieqsa, u kienu qed jissuspettaw li l-ex sieħeb tagħha kien involut.
Wara s-sottomissjonijiet tal-prosekuzzjoni u tad-difiża, il-Qorti, preseduta mill-Maġistrat Abigail Critien, tat il-ħelsien mill-arrest lill-akkużat taħt ċerti kundizzjonijiet. Dan kien fuq depożitu ta’ €3,000 u garanzija personali ta’ €10,000. L-akkużat ġie ordnat jiffirma l-karta tal-bail kuljum.
Il-prosekuzzjoni qed titmexxa mill-Avukati tal-Avukat Ġenerali Jurgen Dalli u Miguel Taliana flimkien mal-Ispettur Audrey Micallef. Id-difiża qed tiġi rappreżentata mill-Avukati Franco Debono, Marion Camilleri, Adreana Zammit u Anthea Bonnici Zammit.
