Is-suċċess tal-Partit Nazzjonalista huwa grazzi wkoll għall-ħaddiema dedikati ta’ Net Media u tal-Partit Nazzjonalista.
Dan ħareġ ċar mil-laqgħat li saru ma’ dawn l-impjegati miż-żewġ kandidati għal Kap ġdid tal-Partit Nazzjonalista – Alex Borg u Adrian Delia.
F’dawn il-laqgħat, il-kandidati kellhom l-opportunità li jisimgħu l-ħsibijiet varji li qasmu magħhom il-ħaddiema li ta’ kuljum ikunu qed jaħdmu sabiex ix-xandir ta’ dan l-istazzjon ikun fost l-aqwa f’pajjiżna. Dan flimkien max-xogħol li jsir online u fil-gazzetti, u x-xogħol li jsir mill-ħaddiema tal-partit.
Il-kandidati spjegaw il-viżjoni tagħhom sabiex din il-kumpanija tkompli tagħmel progress; kif propju għamlet fl-aħħar xhur meta Net Television kien konfermat bħala l-aktar stazzjon privat segwit f’pajjiżna.
Dawn il-laqgħat saru fid-Dar Ċentrali tal-PN u preżenti kien hemm fost l-oħrajn is-Segretarju Ġenerali Charles Bonello. Apparti minn hekk, saru wkoll laqgħat mal-managment li jieħu ħsieb l-operat tal-midja – fejn ġie spjegat ukoll il-ħidma li qed issir bħalissa, anke bi preparazzjoni għall-iskedi l-ġodda ta’ Net TV u Net FM.
Intant, minbarra l-elezzjoni tas-6 ta’ Settembru f’Konvenzjoni Ġenerali mlaqqgħa apposta għat-tesserati, is-Sibt se ssir it-tieni ġurnata ta’ early voting.
Il-votazzjoni tas-Sibt tiftaħ fid-9am kemm fid-Dar Centrali tal-PN kif ukoll f’Għawdex. Fid-Dar Centrali, il-votazzjoni tagħlaq fis-7pm, filwaqt li f’Ta’ Sannat l-early voting jagħlaq fil-5pm.
Biex wieħed jivvota f’din l-elezzjoni jrid ikun membru tal-PN bit-tessera aġġornata skont kif stabbilit fl-Istatut u fir-Regolamenti.
Kull tesserat irid jieħu miegħu il-karta tal-Identità u l-ittra li ġiet mibgħuta mill-Kummissjoni Elettorali.
