“Il-ħaddiema ta’ Carlo Gavazzi se jibdew jitkeċċew minn hawn u 7 xhur oħra”
“Huwa mifhum li l-ewwel redundancies mhux se jidħlu fis-seħħ qabel mill-inqas seba’ xhur oħra.” Dan saħqitu l-General Workers Union hekk kif spjegat li tul il-ġurnata tal-Ġimgħa qed tiltaqa’ mal-impjegati kollha fl-impjant sabiex tikkomunika s-sitwazzjoni magħhom.
Il-GWU saħqet li din hija daqqa ta’ ħarta serja għal forza tax-xogħol u għal min ilu jaħdem għal snin twal.
Il-Union spjegat li se tibda t-taħditiet sabiex tissalvagwardja dawn il-benesseri ta’ 140 ħaddiem f’din is-sitwazzjoni tant diffiċli.
Il-GWU insistiet li qed tidħol f’diskussjonijiet mal-Ministeru għall-Ekonomija biex jipprovaw isibu impjieg alternattiv, minkejja li sal-lum il-Gvern ma ċċaqlaqx quddiem l-aħbar li ilha tinħema għal dawn l-aħħar 3 ġimgħat.
