Il-milizji tal-Houthi fil-Jemen sofrew daqqa ta’ ħarta kbira oħra bil-qtil, sigħat ilu, tal-Prim Ministru tagħhom, Ahmed al-Rahawi…Dan seħħ waqt attakk mill-qawwiet tal-ajru Iżraeljani fuq Sanaa, il-kapitali tal-Jemen.
L-Iżraeljani qegħdin imexxu kampanja militari diretta kontra l-uffiċjali militari ewlenin tal-Houthi li huma alleati kbar tal-Iran fundamentalista. Dan meta l-Iran jibqa’ l-akbar għadu tal-Iżraeljani u meta hu impenjat għall-qerda totali tal-Istat ta’ Iżrael.
Għaldaqstant, mifhum li l-Prim Ministru al-Rahawi kien fuq il-lista ta’ Iżrael għall-milizji ewlenin immarkati għall-eliminazzjoni …Reazzjoni għall-fatt li l-Houthi għadu qed jattakka lill-bastimenti ta’ Iżrael u oħrajn kummerċjali li jużaw ir-rotot fil-Baħar ta’ Aden, viċin tal-Jemen.
Al-Rahawi miet mal-ewwel meta missila qerdet l-appartament fejn hu kien residenti — bis-sorsi f’Sanaa isostnu li miegħu mietu wkoll diversi assoċjati li kienu influwenti ħafna fil-moviment tal-Houthi.
Fil-fatt, l-uffiċjali Iżraeljani ma jeskludux li, fl-aħħar attakki, sfaw eliminati wkoll il-Ministru tad-Difiża tal-Houthi, Mohamed al-Atifi u l-Kap tal-Istaff tal-Houthi, Muhammad Abd Al-Karim al-Ghamari. Dan meta l-Iżraeljani mexxew bnumru ta’ attakki speċifiċi waqt li dawn l-uffiċjali ewlenin kienu preżenti għal laqgħa tal-Kabinett tal-Houthi fil-limiti ta’ Sanaa.
