Il-Kunsill Lokali ta’ Swieqi ilu għal snin isejjaħ għal azzjoni serja sabiex jiżgura li r-residenti ta’ Swieqi jgawdu l-lokalità tagħhom kif jixirqilhom.
Fi stqarrija l-Kunsill Lokali ta’ Swieqi stqarr il-proposti tal-Kunsill Lokali għal Swieqi dejjem waqgħu fuq widnejn torox.
Il-Kunsill Lokali ta’ Swieqi ilu, għal ħafna snin, isejjaħ lill-Gvern biex jaġixxi bis-serjetà dwar il-problemi f’Swieqi, problemi li komplew jiggravaw maż-żmien.
Quddiem Gvern li għal snin twal abbanduna lir-residenti ta’ Swieqi u ħalliehom jitħabtu waħedhom biex iħossuhom f’sens ta’ sigurtà fil-lokalità tagħhom, il-Kunsill Lokali mhux biss ripetutament kellem lil-Gvern biex jaġixxi iżda ppreżenta wkoll soluzzjonijiet konkreti sabiex ir-residenti ta’ Swieqi jkunu jistgħu jgħixu fit-trankwillità f’raħalhom.
Minkejja laqgħat numerużi matul is-snin mal-Prim Ministru, diversi Ministri, Segretarji Parlamentari u uffiċjali minn awtoritajiet differenti, u minkejja l-proposti ppreżentati, l-appelli kollha li saru dejjem waqgħu fuq widnejn li ma jisimgħux. Il-Gvern baqa’ ma għamel xejn.
Il-Kunsill Lokali ta’ Swieqi qed iwissi li s-sitwazzjoni kif inhi hi diġà serja u se tkompli tmur għall-agħar fix-xhur u s-snin li ġejjin, hekk kif in-numru ta’ propjetà li qed jinkrew se jkompli jiżdied.
Il-Kunsill Lokali qed jagħmel kollox fi ħdan is-setgħat tiegħu biex itaffi l-problemi li qed jaffaċċjaw ir-residenti, u dan mhux xi ħaġa li beda jagħmel illum. Il-Kunsill ilu snin jaħdem biex itejjeb is-sitwazzjoni – ferm qabel ħaddieħor.
Il-Kunsill Lokali jibqa’ jemmen li t-12-il proposta li ppreżenta lill-Gvern f’Lulju huma t-triq ’il quddiem. Dawn il-miżuri jkopru r-regolazzjoni tas-suq tal-kiri għal żmien qasir, l-infurzar tal-liġijiet dwar l-iskart, il-kontroll tal-istorbju u l-vandaliżmu bil-lejl u kooperazzjoni aħjar bejn l-awtoritajiet u l-Kunsill Lokali ta’ Swieqi.
Il-Kunsill appella għal bżonn ta’ azzjoni serja u immedjata. Hemm bżonn ta’ Gvern li jisma’, bir-residenti ta’ Swieqi jistħoqqilhom jgħixu fil-lokalità tagħhom b’dinjità, mhux bħal barranin f’darhom stess.
Il-Kunsill Lokali qed jitlob azzjoni immedjata mill-Gvern għax ir-residenti ta’ Swieqi mhumiex ċittadini tat-tieni klassi. Huma wkoll għandhom id-dritt igawdu l-lokalità tagħhom kif jixirqilhom.
Fl-istqarrija tagħhom, il-Kunsill Lokali ta’ Swieqi reġgħu rrimarkaw il-lista ta’ 12-il proposta li ppreżentaw lill-Gvern f’Lulju li għadda:
- Permessi – Iffriżar tal-approvazzjonijiet ta’ short-let sakemm jitlesta studju tal-carrying capacity. Dan jiżgura li d-deċiżjonijiet ikunu bbażati fuq evidenza, mhux pressjoni.
- Klassifikazzjoni Legali ġdida – Short-lets jitqiegħdu taħt Kategorija D (Użu Kummerċjali). Ikkunsidrati bħala negozji, mhux djar residenzjali.
- Lokalitajiet limitati – Qafas ta’ short-lets għal kull lokalità, fuq ftiehem mill-MTA u l-Kunsill Lokali. Jipproteġi l-bilanċ tal-komunità.
- Liċenzjar Kondizzjonali – Ħruġ ta’ permessi mill-MTA biss bi klawsoli dwar l-iskart u storbju. Responsabbiltà diretta għas-sidien.
- Ippjanar – Koordinazzjoni mal-MTA – L-PA trid tfittex approvazzjoni mill-MTA qabel ma tingħata bidla fl-użu. Ma jiġux approvati permessi li jinjoraw l-impatti tat-turiżmu.
- Regolamenti Modernizzati – Ir-regoli skaduti jiġu sostitwiti b’leġiżlazzjoni orjentata lejn il-futur.
- Rekwiżit għall-Immaniġġjar tal-Iskart – L-ebda liċenzja mingħajr ħażna tal-iskart jew ġbir privat.
- Infurzar Konġunt – MTA + Kunsill Lokali jikkoordinaw fejn jidħol monitoraġġ.
- Garanzija tal-Propjetarji – Meħtieġa sigurtà finanzjarja depożitata mal-MTA.
- Pulizija – B’mod regolari l-pulizija jagħmlu rotot tagħhom bil-lejl kemm bil-mixi u bil-vetturi.
- Ħinijiet tal-Bejgħ ta’ Xorb Alkoħoliku – Restrizzjoni bejn is-6am–11pm fiż-żoni residenzjali. Jaqta’ l-istorbju bil-lejl.
- Multa Immedjata – Aktar saħħa lill-pulizija b’body-cams u EPOS. Infurzar rapidu, effettiv.
