Il-Partit Nazzjonalista juri solidarjetà sħiħa mal-140 impjegat tal-kumpanija Carlo Gavazzi Limited u mal-familji tagħhom li bħalissa qed jgħaddu minn mumenti ta’ inċertezza u tbatija wara d-deċiżjoni tal-kumpanija li twaqqaf l-operat tagħha f’Malta.
Din id-deċiżjoni li Carlo Gavazzi tagħlaq il-bibien tagħha f’Malta u tagħti s-sensji lil dawn il-ħaddiema hija xhieda ċara tal-instabbiltà li qed tolqot is-settur tal-manifattura f’pajjiżna – settur essenzjali li jikkontribwixxi b’mod sinifikanti lejn il-Prodott Gross Domestiku u lejn il-ħolqien ta’ impjiegi ta’ kwalità.
Il-Gvern Laburista ilu snin twal jitkellem dwar l-importanza tas-settur tal-manifattura u dwar l-investiment li qal li qed jagħmel, iżda l-fatti juru mod ieħor. Dan huwa Gvern li jwiegħed ħafna u ma jwettaqx. Mhuwiex kapaċi jżomm il-kumpaniji eżistenti, aħseb u ara kemm hu kapaċi jattira oħrajn ġodda, apparti li ma ħoloqx settur wieħed ġdid fl-ekonomija tagħna li jattira impjiegi ta’ kwalità. Dan juri b’mod ċar falliment ta’ politika industrijali u ta’ viżjoni għall-pajjiż.
Il-Gvern qed ikompli jagħlaq għajnejh quddiem il-problemi serji ta’ kompetittività li għandu pajjiżna. In-nuqqas ta’ investiment fit-teknoloġija u fl-innovazzjoni qed inaqqas il-produttività u jpoġġina fi żvantaġġ ikbar bħala gżira li għandha bżonn tikkompeti mal-bqija tad-dinja.
Minflok juża l-fondi pubbliċi biex jagħti spinta lin-negozji tagħna permezz ta’ investimenti f’setturi strateġiċi u jghin biex kumpaniji jinvestu iżjed f’teknoloġija gdida bħall-Intelliġenza Artifiċjali u l-awtomazzjoni, il-Gvern Laburista jippreferi jonfoq it-taxxi tan-nies fuq konsulenzi vojta u fuq impjiegi għall-ħbieb tal-ħbieb, kif rajna fil-każi ta’ Chris Cardona u Neville Gafà.
Għall-kuntrarju, il-Partit Nazzjonalista jikkonferma l-impenn tiegħu u jwiegħed li juża l-fondi nazzjonali biex jinvesti bis-serjetà fl-avvanz teknoloġiku, fl-innovazzjoni u fl-awtomazzjoni. Dan biex jinħolqu aktar impjiegi ta’ kwalità, jinżammu l-kumpaniji eżistenti u nattiraw oħrajn ġodda lejn pajjiżna.
In-nuqqas ta’ investiment min-naħa tal-Gvern biex iħarreġ lill-ħaddiema bl-iskills meħtieġa mill-industrija huwa ċar u kien enfasizzat mill-kumpanija stess. Il-PN iwiegħed li, kif stabbilit fil-viżjoni ekonomika tiegħu, se jsir investiment bla preċedent biex tingħata kull għajnuna lill-ħaddiema biex jiżviluppaw u jiksbu ħiliet ġodda. Dan biex ikollhom xogħol ta’ valur miżjud, filwaqt li jingħataw ukoll l-appoġġ finanzjarju meħtieġ biex jinvestu fil-futur tagħhom, fil-futur tal-familji tagħhom u fil-futur tal-pajjiż. Il-Gvern issa għandu l-opportunità li jadotta l-proposta tal-Oppożizzjoni biex jinvesti f‘dawn il-ħaddiema.
Il-Partit Nazzjonalista jemmen li s-settur tal-manifattura f’Malta jista’ u għandu jibqa’ pilastru ta’ tkabbir u prosperità, iżda dan jista’ jsir biss permezz ta’ tmexxija serja, viżjoni ċara u azzjoni konkreta.
L-istqarrija tal-PN kienet maħruġa mid-deputati Ivan Castillo, Joe Giglio u Jerome Caruana Cilia.
