Libjan ta’ 36 sena, Amer Enir Elssaeḥ, ammetta fil-Qorti li seraq ‘scooter’ elettriku f’Ħal Qormi aktar kmieni dan ix-xahar. Huwa ġie mixli b’serq, ħsara, u li jgħix ħajja ta’ vagabundaġġ, mingħajr indirizz fiss jew mezzi ta’ għajxien stabbli.
Skont il-prosekuzzjoni, il-każ seħħ fit-22 ta’ Awwissu fi Triq Ġuże’ Duca, Ħal Qormi, meta Elssaeḥ seraq ‘scooter’ li jiswa madwar €180, wara li kissirlu ċ-ċinga tas-sigurtà. Il-Pulizija arrestawh ħamest ijiem wara, fis-27 ta’ Awwissu.
L-akkużat ġie wkoll mixli bħala reċidivist, billi fil-passat intbagħat il-ħabs għal sentejn wara li nstab fil-pussess ta’ droga sintetika. Fil-Qorti, Elssaeḥ wieġeb ħati għall-akkużi kollha, u spjega li l-azzjonijiet tiegħu kienu mmexxija minn problemi ta’ droga u diffikultajiet finanzjarji, billi bħalissa mhux jaħdem u m’għandux fejn joqgħod, u li dejjem jiġri fit-toroq.
L-avukati tad-difiża talbu li jitħejja rapport ta’ qabel is-sentenza (pre-sentencing report) sabiex il-Qorti tieħu inkunsiderazzjoni ċ-ċirkostanzi personali tal-akkużat, partikolarment il-fatt li hu barrani, bla mezzi, u bla stabbiltà soċjali.
Il-Maġistrat Leonard Caruana ordna li l-akkużat jinżamm arrestat sakemm tingħata s-sentenza, li mistennija fit-3 ta’ Ottubru. Il-prosekuzzjoni qed titmexxa mill-Ispettur John Sammut, assistit mill-avukat Giuliana Magro Conti mill-Uffiċċju tal-Avukat Ġenerali. L-akkużat qed jiġi rappreżentat mill-avukat tal-għajnuna legali Marty Farrugia.
