Kaptan ta’ dgħajsa li ċaħad fil-Qorti li weġġa’ b’negliġenza turista Spanjola fil-Blue Lagoon – ingħata l-ħelsien mill-arrest. Lucas Federico Castro, raġel Arġentin ta’ 37 sena u residenti x-Xewkija, Għawdex, tressaq il-Qorti Għawdxija l-Ġimgħa filgħodu, fejn wieġeb mhux ħati għall-akkuża li kkawża ġrieħi gravi b’negliġenza lil turista ta’ 18-il sena.
Il-każ imur lura għax-xahar li għadda, meta, skont informazzjoni pprovduta mill-Pulizija, għall-ħabta tal-4:30 pm, it-turista kienet qed titla’ fuq dgħajsa li kienet wiefqa fil-Blue Lagoon meta ntlaqtet mill-iskrun tagħha, li kien għadu qed jaħdem dak il-ħin. B’konsegwenza ta’ dan, it-tfajla sofriet ġrieħi gravi f’saqajha.
Għalkemm l-inkjesta maġisterjali dwar l-inċident għadha għaddejja, il-Pulizija xorta għażlu li jressqu lill-kaptan taħt arrest quddiem il-Qorti. L-avukat tad-difiża Matthew Xuereb, talab għall-ħelsien mill-arrest, u sostna li kien inċident sfortunat, fejn il-kaptan kien qed jipprova jgħin lit-turista li kienet tinsab f’diffikultà, iżda sfortunatament intlaqtet mill-iskrun.
Il-Qorti laqgħet it-talba għall-ħelsien mill-arrest fuq depożitu ta’ €1,000 u garanzija personali ta’ €7,000. Ġie ordnat jiffirma fl-Għassa tal-Pulizija u kienet imposta curfew fuqu sabiex jinżamm taħt kontroll sa ma tissokta l-proċedura.
Il-Maġistrart Brigette Sultana semgħet il-każ filwaqt li l-Ispettur Keith Xerri mexxa l-prosekuzzjoni. L-Avukati Matthew Xuereb u Francesca Vella dehru għall-akkużat.
