L-Arċisqof Charles Scicluna se jiċċelebra quddiesa f’lejlet il-festa ta’ San Girgor il-Kbir fil-Knisja Parrokkjali ta’ San Girgor l-Kbir f’Tas-Sliema, nhar il-Ħadd 7 ta’ Settembru fid-9:30am u l-għada t-Tnejn, 8 ta’ Settembru, festa pubblika ta’ Jum il-Vitorja, fid-9:30am, l-Arċisqof jiċċelebra quddiesa pontifikali fil-festa tat-Twelid tal-Verġni Marija, fil-Kolleġġjata ta’ Marija Bambina fin-Naxxar.
Nhar il-Ħadd 14 ta’ Settembru fid-9:30am, l-Arċisqof jiċċelebra quddiesa tal-festa tal-Madonna tal-Grazzja, fis-santwarju ddedikat lilha f’Ħaż-Żabbar. Il-Ħaddd ukoll 14 ta’ Settembru, fis-6:30pm, l-Arċisqof jiċċelebra quddiesa fil-festa tal-Eżaltazzjoni tas-Salib u l-75 sena mill-għoti tat-titlu ta’ Bażilika Minuri lill-knisja ta’ Sant’Elena f’Birkirkara.
Nhar il-Ġimgħa 26 ta’ Settembru fis-6:30pm, l-Arċisqof jiċċelebra quddiesa li tagħti bidu għall-ħidma pastorali ta’ Patri Pawl Bugeja OFM Cap. bħala l-kappillan il-ġdid tal-Parroċċa tat-Trinità Qaddisa fil-Marsa, u s-Sibt 27 ta’ Settembru fis-6pm, l-Arċisqof jiċċelebra quddiesa bir-rit tal-professjoni perpetwa ta’ Sr Josette Farrugia fil-Kongregazzjoni tas-Sorijiet Ursolini, fil-Knisja tal-Madonna ta’ Loreto fi Gwardamanġa.
Il-Ħadd 28 ta’ Settembru fid-9:30am, l-Arċisqof jiċċelebra quddiesa fis-60 anniversarju ta’ relazzjonijiet diplomatiċi bejn is-Santa Sede u Malta, fil-Konkatidral ta’ San Ġwann fil-Belt, u l-għada t-Tnejn 29 ta’ Settembru fl-10am, l-Arċisqof jiċċelebra quddiesa fil-Ġublew tal-Forzi Dixxiplinati fil-Konkatidral ta’ San Ġwann fil-Belt.
