Milan kisbu l-ewwel rebħa dan l-istaġun meta barra minn darhom għelbu lil Lecce 2-0. Milan kellhom żewġ gowls ta’ Matteo Gabbia u Santiago Gimenez imħassrin mill-VAR qabel ma marru fil-vantaġġ fis-66 minuta permezz ta’ Ruben Loftus-Cheek. It-tim ta’ Massimiliano Allegri rdoppja fis-86 minuta permezz ta’ Christian Pulisic.
F’partita oħra, ikompli l-bidu mpressjonanti ta’ Cremonese meta kisbu t-tieni rebħa konsekuttiva bl-iskor ta’ 3-2 fuq Sassuolo. Vantaġġ doppju għal Cremonese fl-ewwel taqsima bil-gowls jaslu minn Filippo Terracciano u Franco Vazquez. Sassuolo għamlu rimonta fit-tieni taqsima u ġabu l-iskor indaqs b’gowls ta’ Andrea Pinamonti u Domenico Berardi permezz ta’ penalty. Cremonese skorjaw il-gowl tar-rebħa fl-aħħar ħinijiet tal-partita b’penalty ta’ Manuel De Luca.
